नगर  ः अतिवृष्टीने जिल्ह्यातील १५८३ गावांतील सुमारे सहा लाख ३६ हजार १४६ शेतकऱ्यांच्या ४ लाख ५४ हजार १२ हेक्टर क्षेत्रावरील शेती पिकांचे ३३ टक्क्यांपेक्षा जास्त नुकसान झाले आहे. प्रशासनाकडून प्रारंभी केलेल्या नजर अंदाजापेक्षाही हे नुकसान जास्त आहे. झालेल्या नुकसानीपोटी जिल्ह्यातील शेतकऱ्यांना मदतीसाठी तब्बल ४७५ कोटी १० लाखांची गरज आहे. कृषी विभाग व महसूल प्रशासनाने केलेल्या पंचनाम्याच्या अंतिम अहवालातून ही बाब स्पष्ट झाली आहे. हा अंतिम अहवाल शासनाला पाठवला आहे.  

जिल्ह्यात आॅक्टोबर महिन्यात सलग २३ दिवस झालेल्या जोरदार पावसामुळे पिकांचे मोठ्या प्रमाणात नुकसान झाले आहे. विशेष करून बाजरी, कापूस, सोयाबीन, तूर, मका, कांदा यासह भाजीपाला, फळबागा व अन्य पिकांचे मोठे नुकसान झाले. त्यानंतर जिल्हाधिकारी राहुल द्विवेदी व जिल्हा अधीक्षक कृषी अधिकारी शिवाजीराव जगताप यांच्या मार्गदर्शनाखाली नुकसान झालेल्या पिकांचे महसूल व कृषी विभागाने पंचनामे केले. त्यांचा अंतिम अहवाल शुक्रवारी तयार केला असून तो तातडीने शासनाला पाठवला आहे. त्यानुसार १५८३ गावांत अतिवृष्टीने सुमारे सहा लाख ३६ हजार १४६ शेतकऱ्यांच्या ४ लाख ५४ हजार १२ हेक्टर क्षेत्रावरील पिकांचे ३३ टक्क्यांपेक्षा जास्त नुकसान झाले आहे. प्रशासनाकडून प्रारंभी केलेल्या नजरअंदाजापेक्षाही हे नुकसान जास्त आहे. झालेल्या नुकसानीपोटी जिल्ह्यातील शेतकऱ्यांना मदतीकरिता तब्बल ४७५ कोटी १० लाखची गरज असल्याचे अहवालात नमूद केले आहे.

जिल्ह्यामध्ये सर्वाधिक नुकसान पाथर्डी तालुक्यात ६१,७८१ हजार हेक्टर क्षेत्राचे  झाले आहे. बागायती क्षेत्रात सर्वाधिक नुकसान झाले असल्याने नेवासा तालुक्यासाठी सर्वाधिक ५४ कोटी ७१ लाखांची गरज असल्याचे सांगण्यात आले.   

नुकसान झालेले क्षेत्र (हेक्टर), कंसात शेतकरी 

तालुकानिहाय हेक्टर क्षेत्राचे नुकसान व कंसात मदतीची गरज  नगर ः २१७३१ (२२ कोटी ४० लाख), पारनेर ः २२२१६ (२७ कोटी १९ लाख), पाथर्डी ः ६१७८१ (४५ कोटी ५६ लाख), कर्जत ः २६७५३ (३० कोटी ११ लाख), श्रीगोंदा ः ३१६४८ (४२ कोटी), जामखेड ः ५२१५ (६ कोटी १८ लाख), श्रीरामपूर ः २९४७२ (३८ कोटी ७८ लाख), राहुरी ः ३०९८२ ( ३९ कोटी ६६ लाख), नेवासा ः ४५२२२ (५४ कोटी ७१ लाख), शेवगाव ः ५९७०५ (४५ कोटी ४३ लाख), संगमनेर ः ३७१९८ (३६ कोटी ३२ लाख), अकोले ः २८३९९ (२५ कोटी ७२ लाख), कोपरगाव ः ३२३२६ (४२ कोटी ३६ लाख), राहाता ः २१३५८ (१८ कोटी ६३ लाख).