नगरसूल, जि. नाशिक : आवक वाढल्याने भाज्यांच्या दरात मोठी घसरण झाली आहे. याचा शेतकऱ्यांना आर्थिक फटका सहन करावा लागत आहे. भाजीपाला विक्रीतून मिळणाऱ्या उत्पन्नातून खर्चही निघत नसल्याने येवला तालुक्यातील कुसमाडी येथील साठे बंधूंनी शेतातील मेथी व कोथिंबीर पिकावर नांगर फिरविला. चालू वर्षी अतिवृष्टीमुळे कांदा, मका, कापूस पिकांचे मोठ्या प्रमाणावर नुकसान झाले. कांदा लागवडीसाठी रोपे उपलब्ध नसल्याने अनेक शेतकऱ्यांनी मेथी, कोथिंबीर, शेपू, पालक पालेभाज्यांची लागवड केली. मात्र सर्वत्र भाज्यांची मोठ्या प्रमाणात आवक होत असल्याने भाज्यांना कवडीमोल दर मिळत आहे. उत्पादन खर्च तर दूरच, केवळ वाहतुकीचा खर्चही मिळत नसल्यामुळे प्रभाकर साठे व अशोक साठे या शेतकरी बंधूंनी पिकविलेल्या मेथी व कोथिंबिरीच्या जोमदार पिकांवर जड अंतःकरणाने नांगर फिरविण्याचा निर्णय घेतला. येथील प्रभाकर साठे यांनी १०० रुपये किलो दराने ७५ किलो मेथी बियाणे विकत आणून एक एकरात मेथीचे पीक घेतले. मशागत, खत, पाणी व मेहनतीने जोमदार पीक तयार केले. मात्र बाजारात सध्या भाजीपाल्याला कवडीमोल दर मिळत आहे. त्यामुळे जड अंतःकरणाने उभ्या मेथीच्या पिकावर नांगर फिरविला आहे. त्यांचे बंधू अशोक साठे यांनी कोथिंबीर लागवड केली. मात्र त्यांचीही तीच गत झाल्याने कोथिंबीर पिकांवर रोटाव्हेटर फिरविण्याची वेळ आली. कोळगाव येथील शेतकरी विजय धनवटे यांनीही मेथी व कोथिंबीर पिकावर नाइलाजाने नांगर फिरविला आहे. प्रतिक्रिया अतिवृष्टीमुळे मका, कांदा पिकाचे अतोनात नुकसान झाले. मेथीच्या पिकाचा हातभार लागेल या आशेने पीक घेतले. पण उत्पादन खर्च दूरच वाहतूक खर्चही वसूल होत नसल्याने नांगर फिरविण्याची वेळ आली आहे. - प्रभाकर साठे, शेतकरी, कुसमाडी, ता. येवला