पुणे : पेट्रोल आणि डिझेलमध्ये इथेनॉल मिसळण्याचे प्रमाण दहावरून वीस टक्‍क्‍यांपर्यंत वाढवावे, यासह एकूणच देशभरातील इथेनॉलचे नव्याने धोरण निश्‍चित करण्यासाठी ‘इथेनॉल हे वाहतुकीचे इंधन’ या विषयावर पुण्यात उद्या (शुक्रवारी, ता. २४) परिषद होणार आहे. याचे उद्‌घाटन केंद्रीय वाहतूकमंत्री नितीन गडकरी यांच्या हस्ते होईल. सेंट्रल इन्स्टिट्यूट ऑफ रोड ट्रान्सपोर्टच्या (सीआयआरटी) वतीने आयोजित या परिषदेस पेट्रोलियम मंत्री धर्मेश प्रधान, माजी केंद्रीय मंत्री शरद पवार, राज्याचे सहकारमंत्री सुभाष देशमुख, ऊर्जामंत्री चंद्रशेखर बावनकुळे, एएनईआरचे केंद्रीय सचिव आनंद कुमार उपस्थित राहतील, अशी माहिती सीआयआरटीचे संचालक राजेंद्र पाटील, माजी केंद्रीय मंत्री अण्णासाहेब पाटील आणि वसंतदादा शुगर इन्स्टिट्यूटचे संचालक शिवाजीराव देशमुख यांनी दिली. पाटील म्हणाले, ‘‘देशात दुचाकी आणि चारचाकी वाहनांची संख्या वाढत असल्याने  इंधन साठ्याची कमतरता जाणवत आहे. त्यामुळे ८२ टक्के इंधन आयात करावे लागत आहे. सध्या देशात केवळ १८ टक्के इंधन साठा शिल्लक असून, पंधरा वर्षांनंतर देशाला पेट्रोल, डिझेलसाठी दुसऱ्या देशांवर अवलंबून राहावे लागणार आहे. सध्या पेट्रोल आणि डिझेलमध्ये दहा टक्केच इथेनॉलचे मिश्रण करण्यास परवानगी दिली आहे. त्यामध्ये वीस टक्‍क्‍यांपर्यंत वाढ करणे गरजेचे आहे. तसे केल्यास पैशाचीही बचत होईल.’’ महाराष्ट्रातील ९५ टक्के साखर कारखान्यांमध्ये इथेनॉलची निर्मिती करण्याची क्षमता आहे. पूर्ण क्षमतेने त्याचा वापर केल्यास वर्षाला ६५ कोटी लिटर इथेनॉलची निर्मिती होऊ शकते. सध्या केवळ ३० ते ३५ कोटी लिटर इथेनॉलची निर्मिती होत असून केंद्र सरकारने याबाबत धोरणात्मक निर्णय घेण्याची गरज आहे.  - राजेंद्र पाटील, संचालक, सीआयआरटी