नागपूर : परतीच्या पावसाचा फटका बसल्याने या वर्षी बाजारात झेंडू फुलांच्या उपलब्धतेवर मर्यादा राहणार असल्याने दरात तेजीचा अंदाज वर्तविला जात आहे. नागपुरात सध्या झेंडूची घाऊक ४५ ते ५० रुपये किलोने विक्री होत असून, लक्ष्मीपूजनाच्या निमित्ताने मागणी वाढल्यास हेच दर ९० ते १०० रुपये किलोपर्यंत पोचण्याचा अंदाज उत्पादक वर्तवित आहेत.

विदर्भात नागपूर, अमरावती, अकोला, बुलडाणा, वाशीम या भागांत मोठ्या प्रमाणावर फूल उत्पादन होते. या वर्षी पावसाचा फटका पारंपरिक पिकांसोबतच फूलशेतीलादेखील बसल्याने फुलाच्या उत्पादकतेवर त्याचा परिणाम झाला आहे. दसऱ्याला फुलांची आवक कमी असल्याचे आणि मागणी वाढती आहे, असे लक्षात येताच दर १२० रुपये किलोपर्यंत पोचले. दिवाळीच्या काळातदेखील झेंडू तेजीत राहण्याचा अंदाज फूल उत्पादकांना आहे.