नाशिक   : जिल्ह्यात दिंडोरी, नाशिक तालुक्यांत बहुतांश भागांत शनिवारी (ता. १९) दुपारपासून पाऊस थोड्या फार प्रमाणात सुरू आहे. ऐन दिवाळीत सुरू झालेल्या या पावसाने द्राक्ष बागांच्या हंगामात अडचणी येत आहेत. सध्या द्राक्ष छाटणीचा हंगाम शेवटच्या टप्प्यात आहे. सप्टेंबर-ऑक्टोबरमध्ये छाटणी केलेल्या बागा आता फुलोरा, फेलफुट, डिपिंग या अवस्थेत असल्याने या पावसामुळे बागांना धोका निर्माण झाला आहे. फुलोरा अवस्थेतील बागांमध्ये मणीगळ मोठ्या प्रमाणावर दिसून येत आहे. तसेच, डाऊनी रोगाचा प्रादुर्भाव वाढला आहे. हा प्रादुर्भाव रोखण्यासाठी शेतकरी भर पावसात फवारणी करताना दिसत आहेत. 

जिल्ह्यात काही ठिकाणी तुरळक तर काही ठिकाणी जोरात पाऊस होत आहे. सध्या द्राक्ष बागा विविध अवस्थांमध्ये आहेत. काही बागांच्या छाटण्या सुरू आहेत. काही बागा पोंगावस्थेत आहेत. काही बागा फेलफुट ते कळीच्या डीप अवस्थेत आहेत. या हवामानामध्ये सगळ्यात जास्त धोका दोडा अवस्थेपासून मणीधारणा अवस्थेपर्यंतच्या बागांना आहे. त्यामुळे शेतकऱ्यांनी प्रतिबंधात्मक योजना सुरू केल्या आहेत. डिझेलचे दर वाढल्याने बुरशीनाशकांची फवारणी करण्यासाठी शेतकऱ्यांना आर्थिक भुर्दंड सोसावा लागत आहे.