सातारा : मागील हंगामात विनापरवाना ऊस गाळप करणाऱ्या, तसेच गतहंगामातील बाकी ऊस बिल न देता सुरू केलेल्या कारखान्यास गाळप परवाना देऊ नये, अशी मागणी बळिराजा शेतकरी संघटनेने साखर आयुक्त संभाजी कडू-पाटील यांच्याकडे निवेदनाद्वारे केली आहे. संघटनेचे केंद्रीय अध्यक्ष पंजाबराव पाटील यांच्या नेतृत्वाखाली पदाधिकारी व कार्यकर्त्यांनी नुकतेच साखर आयुक्तांची भेट घेऊन याबाबत निवेदन दिले. निवेदनात संघटनेने म्हटले आहे की, गतहंगामातील उसाला सातारा जिल्ह्यात अनेक कारखान्यांनी ४०० ते ६०० रुपयांने कमी ऊस बिल दिले असल्याने शेतकऱ्यांचे आर्थिक नुकसान होत आहे.

तसेच रयत सहकारी कारखान्याने मागील हंगामातील जवळपास १४ कोटी रुपये बुडविले असून, गाळप परवाना नसतानाही ऊस गाळप केले आहे. मागील बाकी मिळेपर्यंत रयत कारखान्यास गाळप परवाना देऊ नये.

लोकनेते बाळासाहेब देसाई कारखान्याने शेतकऱ्यांना दोन प्रकारे ऊस बिल देऊन शेतकऱ्यांवर अन्याय केला आहे. साखर कारखान्यांनी मागील हंगामातील ऊस बिल द्यावे तसेच या हंगामातील पहिला हप्ता जाहीर केल्याशिवाय कारखान्यास गाळप परवाने देऊ नका; अन्यथा साखर आयुक्त कार्यालयासमोर उपोषण करण्यात येईल, असा इशाराही देण्यात आला आहे. या वेळी संस्थापक अध्यक्ष बी. जी. काका पाटील, जिल्हा अध्यक्ष साजिद मुल्ला आदी उपस्थित होते.