परभणी ः परभणी जिल्ह्यात २०१८-१९ च्या खरीप हंगामातील तुरीची प्रतिहेक्टरी सरासरी उत्पादकता ४ क्विंटल २४ किलो (एकरी १ क्विंटल ६९६ किलो) एवढी आली आहे. संयुक्त पीककापणी प्रयोगाच्या निष्कर्षाच्या विश्लेषणानंतर हे स्पष्ट झाले. गतवर्षी (२०१७-१८) च्या प्रतिहेक्टरी तूर उत्पादकतेच्या तुलनेत यंदा प्रतिहेक्टरी १० क्विंटल ६६ किलोने घट आली. २०१२-१३ ते २०१६-१७ या पाच वर्षांतील सरासरी उत्पादकतेपेक्षा प्रतिहेक्टरी १ क्विंटल ६२ किलोने घट आली आहे.

यंदाच्या हंगामातील तुरीची उत्पादकता निश्चित करण्यासाठी जिल्ह्यातील सर्व नऊ तालुक्यांमध्ये कृषी, महसूल, ग्रामविकास विभागातर्फे एकूण १४४ पीककापणी प्रयोगांचे नियोजन करण्यात आले होते. या सर्व पीककापणी प्रयोगाच्या निष्कर्षाचे विश्लेषण करण्यात आले. त्यानुसार जिल्ह्याची तुरीची प्रतिहेक्टरी उत्पादकता सरासरी ४ क्विंटल २४ किलो एवढी आल्याचे आढळून आले आहे.

गतवर्षी जिल्ह्याची तुरीची प्रतिहेक्टरी सरासरी उत्पादकता १४ क्विंटल ९० किलो एवढी आली होती; तर २०१२-१३ ते २०१६-१७ या पाच वर्षांर्ची प्रतिहेक्टरी सरासरी उत्पादकता ५ क्विंटल ८६ किलो एवढी आहे. गतवर्षीच्या तुलनेत प्रतिहेक्टरी १० क्विंटल ६६ किलोने तर पाच वर्षांतील तुरीच्या सरासरी उत्पादकतेच्या तुलनेत १ क्विंटल ६२ किलोने घट आली आहे. यंदा जिल्ह्यात परभणी तालुक्याची तुरीची प्रतिहेक्टरी उत्पादकता सर्वाधिक म्हणजे ६ क्विंटल ४५ किलो (एकरी २ क्विंटल ५८ किलो) एवढी आली. पालम तालुक्यात तुरीची उत्पादकता सर्वात कमी म्हणजे प्रतिहेक्टरी २ क्विंटल ३६ किलो (एकरी ९४ किलो) एवढी आली. या संदर्भात कृषी विभागाच्या सूत्रांनी माहिती दिली.