नवी दिल्ली : कोरोना व्हायरसचा फैलाव रोखण्यासाठी केंद्रीय आरोग्य मंत्रालयाने देशभरातील साऱ्या शाळा, महाविद्यालये, जलतरण तलाव व मॉल्स ३१ मार्चपर्यंत बंद ठेवण्याचे निर्देश सोमवारी दिले.  शेकडो-हजारोंची गर्दी जमणाऱ्या ठिकाणांपैकी संसद अधिवेशन वगळता बहुतांश सारी ठिकाणे आता कोरोनाच्या धास्तीने बंद झालेली आहेत. कोरोना विषाणूची लागण आत्तापर्यंत १२१ लोकांना झाली असून १३ रूग्ण बरेही झाले आहेत, अशी माहितीही केंद्राने दिली. केंद्रीय आरोग्य मंत्रालयाचे संयुक्त सचिव लव अग्रवाल यांनी  सायंकाळी सांगितले की ३१ मार्चपर्यंत देशभरातील साऱ्या शाळा-महाविद्यालये, जलतरण तलाव, मॉल आदी बंद ठेवण्यात येणार असून सर्व राज्यांना त्याबाबतची मार्गदर्शिका जारी करण्यात आली आहे. अनेक राज्य सरकारे, संस्था व कंपन्यांनी सार्वजनिक वाहतुकीचा कमीतकमी उपयोग लोकांनी करावा यासाठी घरूनच कामकाज करण्याची मुभा दिली आहे.