नांदेड  : विधानसभा निवडणुकीसाठी नांदेड, परभणी, हिंगोली जिल्ह्यांतील १६ मतदारसंघात काही ठिकाणी तिरंगी, तर काही ठिकाणी बहुरंगी लढती होण्याची शक्यता आहे. वंचित बहुजन आघाडी, महायुती- आघाडीतील बंडखोरांमुळे अनेक मतदारसंघांत अटीतटीच्या लढती होण्याची शक्यता आहे. माजी मुख्यमंत्री अशोक चव्हाण उमेदवार असलेल्या भोकर मतदारसंघातील लढतीकडे संपूर्ण राज्याचे लक्ष लागले आहे. बंडखोरी, गटबाजीमुळे महायुती, आघाडीमध्ये धुसपुस सुरू आहे. भाजपच्या लाटेत काँग्रेस, राष्ट्रवादीपुढे जागा कायम राखण्याचे मोठे आव्हान आहे.

मागच्या निवडणुकीत या जिल्ह्यांत १६ पैकी शिवसेनेला सहा, काँग्रेसला चार, राष्ट्रवादीला तीन, भाजपला दोन, अपक्षाला एक जागा मिळाली. नांदेड जिल्ह्यात लोकसभा निवडणुकीत शिवसेनेचे हेमंत पाटील, प्रताप पाटील चिखलीकर हे आमदार खासदार झाले. भोकर मतदारसंघातून काँग्रेसच्या आमदार अमिता चव्हाण यांच्याऐवजी माजी खासदार अशोक चव्हाण निवडणूक लढवत आहेत. विद्यमान आमदारांपैकी काँग्रेसच डी. पी. सावंत (नांदेड उत्तर), वसंतराव चव्हाण (नायगाव), शिवसेनेचे सुभाष साबणे (देगलूर), नागेश पाटील आष्टीकर (हदगाव), भाजपचे तुषार राठोड (मुखेड), राष्ट्रवादीचे प्रदीप नाईक (किनवट) हे सहाजण, तर माजी आमदारांपैकी भाजपकडून बापुसाहेब गोरठेकर (भोकर), भीमराव केराम (किनवट), काँग्रेसचे रावसाहेब अंतापूरकर (देगलूर), माधवराव पाटील जवळगावकर (हदगाव) हे निवडणूक रिंगणात आहेत.

मागच्यावेळी परभणी जिल्ह्यातील राष्ट्रवादीचे विजय भांबळे (जिंतूर), डॅा. मधुसुदन केंद्रे (गंगाखेड), शिवसेनेचे डॉ. राहुल पाटील (परभणी), अपक्ष मोहन फड (पाथरी)विजयी झाले. ते यंदा उमेदवार आहेत. जागांच्या अदलाबदलीत शिवसेनेला गंगाखेडची, तर भाजपला पाथरी, जिंतूरच्या जागा मिळाल्या. राष्ट्रवादीच्या दोन्ही जागा कायम आहेत. गेल्या निवडणुकीत हिंगोली जिल्ह्यात भाजपचे तान्हाजी मुटकुळे (हिंगोली), काँग्रेसचे डॉ. संतोष टारफे (कळमनुरी), शिवसेनेचे डॉ. जयप्रकाश मुंदडा (वसमत) विजयी झाले. हे तिघेही यंदा उमेदवार आहेत.

नांदेड दक्षिण मतदासंघातून भाजप शिवसेना, राष्ट्रवादीचे, याशिवाय हदगाव, जिंतूर, पाथरीत शिवसेनेचे, परभणीत काँग्रेसचे, तर वसमतमध्ये भाजपचे बंडखोर आहेत. गंगाखेड मतदारसंघात शिवसेना आणि रासपचे उमेदवारात आहेत. बसप, भाकप, शेतकरी कामगार पक्ष, एमआयएम, संभाजी ब्रिगेड आदी पक्षाचे उमेदवार निवडणूक लढवत आहेत. तरी बहुतांश ठिकाणी महायुती- आघाडी-वंचित बहुजन आघाडी यांच्यात तिरंगी लढती होतील. प्रभावी बंडखोर असलेल्या मतदासंघात बहुरंगी लढती होतील. भोकर, नांदेड दक्षिण, नांदेड उत्तर, वसमत, जिंतूर आदि मतदासंघांतील लढती लक्षवेधी ठरतील.