यवतमाळ  ः पांढरकवडा व राळेगाव तालुक्‍यांतील वनक्षेत्रामधील नरभक्षक वाघिणीला जेरबंद करणाची मोहीम वन विभागाच्या वतीने सुरू आहे. ही मोहीम पूर्ण होईपर्यंत वाघिणीचा वावर असलेल्या भागातील नागरिकांनी दक्ष राहावे. नरभक्षक वाघिणीच्या दहशतीमुळे जनावरांच्या चाऱ्याचा प्रश्‍नही वाघिणीचा वावर असलेल्या भागात गंभीर झाला आहे. त्याची दखल घेत गायरान किंवा महसूल विभागाच्या जागेवर चाऱ्याची व्यवस्था करण्यासाठी विशेष मोहीम हाती घेण्यात येणार आहे. वाघिणीच्या भीतीमुळे शेतकऱ्यांना शेतावर जाता येत नाही, त्यामुळेदेखील नुकसान होत असल्याचे निरीक्षण नोंदविण्यात आल्याचे महसूल राज्यमंत्री संजय राठोड यांनी सांगितले.

पांढरकवडा येथील विश्रामगृहात राज्याचे अतिरिक्‍त मुख्य वनसंरक्षक मिश्रा यांच्यासोबत आयोजित बैठकीत ते बोलत होते. नरभक्षक वाघिणीला पकडण्यासाठी सातत्याने प्रयत्न सुरू असल्याचे सांगून मंत्री राठोड म्हणाले, की या जंगलग्रस्त भागात मोठ्या प्रमाणात झुडपे आहेत. या झुडूपात वन्यप्राणी असण्याची शक्‍यता नाकारता येत नाही. त्यामुळे नागरिकांनी जंगलात जनावरे घेऊन जाण्याचे टाळावे.