आंबेठाण, जि. पुणे : शिंदे गाव (ता. खेड) येथे दोन दिवसांपासून बिबट्याचे दर्शन होत असल्याने ग्रामस्थ हवालदिल झाले आहेत. रात्रीच काय पण दिवसाही ग्रामस्थ शेतात जायला नको म्हणतात. याचा फायदा चोरटे घेत असून येथील सुधा नदीसह विहिरींवरील वीजपंपांच्या केबल चोरून नेल्या जात आहेत. येथील टेमगिरे वस्ती परिसरात दोन दिवसांपूर्वी बिबट्याने शेळ्यांवर हल्ला केला होता. त्यामुळे ग्रामस्थांमध्ये भीतीचे वातावरण आहे. ग्रामस्थ घराबाहेर पडत नाहीत, याचा फायदा घेत चोरट्यांकडून शेतकऱ्यांच्या मोटारींच्या केबल लांबविल्या जात आहेत. त्यामुळे अनेकांच्या पिकाच्या पाण्याचा प्रश्न निर्माण झाला आहे. गेल्या दोन दिवसांत सहा ते सात शेतकऱ्यांच्या केबल चोरीला गेल्या आहेत. दरम्यान, या चोऱ्या आणि भविष्यात काही अनुचित प्रकार घडू नये, यासाठी येथील विजय घनवट, अमोल झिंजुरके यांनी चाकण येथे वनाधिकाऱ्यांची भेट घेऊन या   भागात पिंजरा लावण्याची मागणी केली आहे.