कळवाडी, ता. मालेगाव : तालुक्यातील नरडाणे येथे उसाच्या शेतात विजेच्या तारेमुळे आग लागली. त्यात तीन शेतकऱ्यांचा लाखो रुपयांचा ऊस व ठिबक सिंचनाचे साहित्य जळून खाक झाले.

शेतकरी दशरथ बारकू बच्छाव, नयना घनश्याम परदेशी, प्रयागबाई शांताराम सरावत या शेतकऱ्यांच्या शेतातील काढणीला आलेल्या उसाच्या शेतात विजेच्या तारांच्या शॉर्टसर्किटमुळे आग लागली. त्यात लाखो रुपयांचा ऊस जळून खाक झाला. नरडाणे परिसरात वाऱ्‍यासारखी पसरली. आग आटोक्यात आणण्यासाठी परिसरातील शेतकऱ्यांनी शर्थीचे प्रयत्न केले. तोपर्यंत साधारणतः चार ते पाच एकर ऊस जळून खाक झाला. महिन्याभरात ऊस काढणीला येणार होता; तोच आग लागून उसाचे लाखो रुपयांचे नुकसान झाले. या सोबतच ठिबक सिंचनाचे पूर्ण साहित्य जळाले.

घटनास्थळी वीज वितरणच्या अधिकारी यांनी भेट देऊन पाहणी केली. दरम्यान, येथील सरपंच बाळनाथ सरावत यांनी त्वरित पंचनामा करण्याची मागणी केली होती. त्यानुसार तलाठी बनसोड, ग्रामसेवक पी. जी. पांढरे व कृषी अधिकाऱ्यांनी पंच दयाराम सरावत, दादाजी बच्छाव, बाळनाथ सरावत, विलाससिंग परदेशी, पोलिस पाटील विशाखा बोराळे यांच्या उपस्थितीत पंचनामा केला. त्यानुसार दशरथ बच्छाव यांचे दोन लाख ५० हजार, नयना परदेशी यांचे ३ लाख ५० हजार, प्रयागबाई सरावत यांचे ९ लाख ५० हजार इतके नुकसान झाल्याचे समजते. 

  नुकसानभरपाईची मागणी 

शासनाने नुकसानभरपाई पीडित शेतकऱ्यांना त्वरित द्यावी, अशी मागणी सरपंच व पंचकमिटी यांनी केली. वीज कंपनीने लोंबकळणाऱ्या विजेच्या तारांचा बंदोबस्त करावा, अशी मागणी केली.