कुर्डू, जि. सोलापूर  ः माढा तालुक्यातील बेंद ओढ्यास भीमा-सीना जोड कालव्यातून केम मधील शाप्ट क्रमांक तीन येथून अतिरिक्त पाणी सोडण्याचा निर्णय सोमवार (ता.३) मुंबईत मंत्रालय येथे जलसंपदा मंत्री जयंत पाटील यांच्या अध्यक्षतेखाली झालेल्या बैठकीत घेण्यात आला.  मंत्री पाटील यांच्या दालनात ही बैठक पार पडली. माढ्याचे आमदार बबनराव शिंदे, करमाळ्याचे आमदार संजय शिंदे, माढा वेल्फेअर असोसिएशनचे अध्यक्ष धनराज शिंदे, संजय पाटील-घाटणेकर, जिल्हा परिषद सदस्य शंभुराजे मोरे, संदीप पाटील, भारत कापरे, नामदेव हांडे, चौभेपिंपरीचे सरपंच विक्रम उरमोडे, पिंपळखुटेचे पवन पाटील आदी उपस्थित होते. या बैठकीत बेंद ओढ्यासह इतर योजनांच्या विषयावर चर्चा झाली. बेंद ओढ्याला शॅाप्ट नंबर-३ मधून पाणी उचलून अतिरिक्त पाणी देण्याचा निर्णय घेण्यात आल. तसेच पिंपळखुंटे, अंबड,  कुर्डू, बावी, तुळशी या गावांचा सीना-माढा योजनेत समावेश करण्याचा निर्णयही या वेळी झाला. भीमा-सीना जोड कालव्यामध्ये (बोगद्यामध्ये) महादेववाडी येथे गेट बसवण्यात येणार आहे, तसेच कुकडी व दहीगाव उपसा सिंचन योजनेच्या सिंचन योजनेच्या कामासाठी सकारात्मक चर्चा झाली, या सिंचन योजना पाहणीसाठी जलसंपदामंत्री पाटील स्वतः येणार असल्याचे या वेळी सांगण्यात आले. पण सध्या तरी भीमा-सीना जोड कालव्यातून बेंद ओढ्यास पाणी सोडण्याच्या निर्णयामुळे या भागातील शेतकऱ्यांना दिलासा मिळाला आहे.