भंडारा : जिल्हा परिषद अध्यक्षपदी काँग्रेसचे रमेश डोंगरे तर उपाध्यक्षपदी राष्ट्रवादी काँग्रेसचे विवेकानंद कुर्झेंकर यांची निवड झाली. जिल्ह्यात सध्या सुरू असलेल्या राजकीय अस्थिरतेमुळे जिल्हा परिषदेचा गड कोण राखणार याविषयी चर्चांना ऊत आला होता. या निवडीमुळे चर्चांना पूर्णविराम लागला आहे.

जिल्हा परिषदेत काँग्रेस आणि राष्ट्रवादीची सत्ता आहे. अडीच वर्षानंतर अध्यक्षपद अनुसूचित जाती प्रवर्गासाठी राखीव असल्याने त्याकरीता निवडणूक प्रक्रिया पार पडली. अध्यक्षपदाकरीता रमेश डोंगरे, रेखा वासनिक आणि नेपाल रंगारी यांनी अर्ज भरले.

उपाध्यक्षपदाकरीता विनायक बुरडे, मनोहर राऊत, प्रणाली ठाकरे, नीलिमा इलमे आणि विवेकानंद कुर्झेकर यांचे नामनिर्देशन दाखल झाले. रेखा वासनिक, विनायक बुरडे, प्रणाली ठाकरे, मनोहर राऊत यांनी अखेरच्या क्षणी माघार घेतली.

त्यानंतर पार पडलेल्या निवडणुकीत अध्यक्षपदासाठी काँग्रेसचे रमेश डोंगरे यांना ३९ तर भाजपचे नेपाल रंगारी यांनी १२ मते मिळाली. एक सदस्य तटस्थ राहिला. उपाध्यक्ष पदाच्या निवडणुकीत राष्ट्रवादीचे विवेकानंद कुर्झेकर यांना ३९ तर भाजपच्या नीलिमा इलमे यांना १२ मते मिळाली.