जळगाव  ः तांत्रिक व प्रशासकीय मान्यतेची कार्यवाही जलद झाली, परंतु नंतर लाभार्थींच्या याद्या गट विकास अधिकारी कार्यालयांकडून जळगाव जिल्हा परिषदेच्या कृषी विभागाकडे वेळेत न पोचल्याने अवजारे, फवारणी पंप आदी योजनांच्या लाभार्थींना अनुदानाची प्रतीक्षा आहे. 

कृषी विभागातर्फे थेट अनुदान (डीबीटी) तत्त्वावर पलटी नांगर, एचडीपीई पाईप, फवारणी पंप या योजनांबाबत कार्यवाही केली जाते. त्यासाठी स्वनिधीतून तरतूद केली जाते. यंदा निवडणुक जाहीर होण्यापूर्वी कृषी विभागाच्या वरिष्ठ अधिकाऱ्यांनी सर्व योजनांच्या तांत्रिक मान्यतेची कार्यवाही केली. तसेच सर्वसाधारण सभेत सर्व माहिती सादर करून इतर मंजुरीही घेतल्या. प्रशासकीय मान्यतेची कार्यवाही पूर्ण केली. या योजनांबाबत तालुका स्तरावरून गटविकास अधिकारी कार्यालयातर्फे लाभार्थींच्या अंतिम याद्या मागविल्या जातात.

यात ज्या याद्या आचारसंहिता लागू होण्यापूर्वी कृषी समितीकडे प्राप्त झाल्या, त्यांना मंजुरी देण्यात येऊन संबंधित लाभार्थींना अनुदान देण्यास सुरवात झाली.  फवारणीच्या बॅटरीचलित व हातपंपासाठी सात लाख, रोटाव्हेटरसाठी ४५ लाख, एचडीपीई पाईपसाठी ४० लाख रुपये निधीची तरतूद केली आहे. पलटी नांगरसाठी १३० लाभार्थींना अनुदान द्यायचे आहे. फवारणीच्या बॅटरी व इतर पंपांसाठी जादा अर्ज तालुकास्तरावर आले. फवारणीपंपासाठी निम्म्या लाभार्थींची निवड होऊन अनुदान वाटपाची प्रक्रिया पूर्ण झाली आहे.  पलटी नांगर, रोटाव्हेटर, एचडीपीई पाइपसाठी ३० टक्के लाभार्थींच्या याद्या अंतिम करून अनुदान वितरणाची कार्यवाही सुरू झाली. आता निवडणुका आटोपल्यानंतर लाभार्थी निवड व अनुदान वितरणाची कार्यवाही केली जाईल, असे सांगण्यात आले.