परभणी : गतवर्षीच्या खरीप हंगामातील पिकांच्या नुकसानीबद्दल मंडळ हा निकष धरून शेतकऱ्यांना संपूर्ण जोखमीसह विमा परतावा मंजूर करण्यात यावा, या मागणीसाठी शेतकरी विमा संघर्ष समितीतर्फे शुक्रवारी (ता. ६) जिल्ह्यातील विविध ठिकाणी चक्का जाम आंदोलन करण्यात आले. यामुळे अनेक मार्गांवरील वाहतूक काही काळ ठप्प झाली होती. या आंदोलनामध्ये विविध पक्ष, संघटना सहभागी झाल्या होत्या.

सर्व शेतकऱ्यांना त्या-त्या पिकांच्या संपूर्ण जोखीमेसह विमा परतावा मंजूर करण्यात यावा, या मागणीसाठी शेतकरी विमा संघर्ष समितीतर्फे २६ जूनपासून बेमुदत उपोषण सुरू करण्यात आलेले आहे. या आंदोलनांतर्गंत बुधवारी (ता. ४) ठिय्या, गुरुवारी (ता. ५) जिल्हा बंद आंदोलन करण्यात आले.

शुक्रवारी (ता. ६) परभणी तालुक्यातील पोखर्णी, झरी, पेडगाव, खानापूर फाटा अन्य तालुक्यांतदेखील विविध ठिकाणी चक्का जाम आंदोलन करण्यात आले. शेतकरी विमा संघर्ष समितीचे विलास बाबर, राजन क्षीरसागर, किशोर ढगे, माधुरी क्षीरसागर, सोनाली देशमुख या आंदोलनात सहभागी झाले होते.