पुणे: कोरोना विषाणूचा फैलाव रोखण्यासाठी सध्या सुरु असलेल्या लॉकडाऊनमध्ये राज्यातील फळे भाजीपाल्याचा पुरवठा सुरळीत राहण्यासाठी राज्यातील ३०७ बाजार समित्यांपैकी २२० बाजार समित्यांमधून कामकाज सुरु असून, कमीत कमी गर्दीमध्ये बाजार सुरु ठेवण्याचे व्यवस्थापन केले आहे, अशी माहिती पणन संचालक सुनील पवार यांनी दिली. 

याबाबत पवार म्हणाले, ‘‘लॉकडाऊनमध्ये राज्यातील फळे भाजीपाल्याची विस्कळीत झालेली पुरवठा साखळी पूर्ववत झाली आहे. यासाठी पणन, कृषी आणि पोलीस प्रशासनाच्या समन्वयाने काम सुरु झाले आहे. बाजार समित्यांमधून तसेच थेट पणनद्वारे भाजीपाला पुरवठा सुरळीत झाला आहे. यासाठी पुणे, नाशिक आणि मुंबई महानगरपालिकांनी देखील पुढाकार घेतला असून, शहरांमध्ये विविध ठिकाणी भाजीपाला विक्री केंद्रे शेतकरी उत्पादक कंपन्या, शेतकरी गटांद्वारे सुरु केला आहे. तर अनेक गटांनी विविध गृहनिर्माण सोसायट्यांमध्ये थेट विक्री सुरु केली आहे. या विविध उपाययोजनांमधून शहरांमधील पुरवठा साखळी पूर्ववत झाली आहे. यामुळे ग्राहकांनी फळे भाजीपाला किराणा मिळणार नाही, अशी विनाकारण भिती बाळगू नये व या वस्तूंचा साठा करु नये.’’

परवान्याचा सकारात्मक उपयोग करा बाजार समित्या सुरु करण्यासाठी केंद्र सरकारने साथ रोग पसरू नये यासाठीच्या विविध १२ उपाय आणि खबरदारी घेण्याचे सांगितले आहे. त्यानुसार बाजार समित्यांचे कामकाज सुरु आहे. याची जबाबदारी जिल्हा उपनिबंधकांवर देण्यात आलेली आहे. तसेच थेट पणन परवानाधारकांनी देखील आपल्याला दिलेल्या परवान्याचा सकारात्मक उपयोग सध्याच्या आणीबाणीच्या आणि आपत्कालीन परिस्थितीमध्ये करण्याचे देखील आवाहन श्री. पवार यांनी केले आहे.