अकोला : कोरोनाच्या काळात शासन निर्देशानुसार अंतराचे नियम पाळत अकोला परिमंडळातील १.८४ लाख  वीजग्राहकांनी महावितरणचे सुमारे ३२ कोटी रुपये भरले आहेत. 

सद्यःस्थितीत अकोला परिमंडळातील १.८४ लाख ग्राहक दरमहा सरासरी ३२.०३ कोटी रुपयाचा ऑनलाइनद्वारे वीजबिल भरणा करतात. महावितरणच्या प्रादेशिक विभागानुसार नागपूर प्रादेशिक विभागात १० लाख ८८ हजार ग्राहक १८९ कोटी ६४ लाख रुपयांचा, कोकण प्रादेशिक विभागात ३० लाख ५४ हजार वीजग्राहक दरमहा सरासरी ६९५ कोटी रुपयांचा तर पुणे प्रादेशिक विभागातील १८ लाख ७१ हजार ग्राहक ४२५ कोटी ८० लाख रुपयांचा आणि औरंगाबाद प्रादेशिक विभागात ५ लाख ९४ हजार वीजग्राहक १०५ कोटी ४२ लाख रुपयांचा ‘ऑनलाइन’द्वारे वीजबिलांचा भरणा करीत आहे. 

 महावितरणची वेबसाइट व मोबाइल ॲप तसेच अन्य पर्यायांद्वारे ‘ऑनलाइन’ वीजबिल भरणा क्रेडीट कार्ड वगळता निःशुल्क करता येतो. कोरोना विषाणूच्या संसर्गाच्या काळात वीजबिल भरणा केंद्राच्या रांगेत उभे राहणे किंवा गर्दी टाळून घरबसल्या कोणत्याही वेळेत ‘ऑनलाइन’ वीजबिल भरण्याची सोय वीजग्राहकांना उपलब्ध आहे.

लघुदाब वीजग्राहकांसाठी ‘ऑनलाइन’ बिल भरण्यासाठी दरमहा ५०० रुपयांच्या मर्यादेत ०.२५ टक्के सूट देण्यात येत आहे. क्रेडीट कार्ड, डेबिट कार्ड, युपीआय, भीम, इंटरनेट बॅकिंग, मोबाइल वॉलेट, मोबाइल बॅकिंगद्वारे वीजबिल भरणा केल्यास वीज देयकामध्ये ०.२५ टक्के सूट दिली जात असल्याने ग्राहक या सुविधेला पसंती देत असल्याचे महावितरणने स्पष्ट केले आहे.