पुणे  ः कोरोना विषाणूच्या पार्श्वभूमीवर पुणे शहर व ग्रामीण भागात अन्नधान्य आणि जीवनावश्यक बाबींचा पुरवठा सुरळीत व्हावा आणि अन्नधान्याची साठेबाजी होऊ नये यासाठी पुढाकार घेण्यात आला आहे. या दोन्ही बाबींसाठी शहरी भागाकरिता अन्नधान्य वितरण अधिकारी तर ग्रामीण भागाकरिता जिल्हा पुरवठा अधिकारी यांच्या अध्यक्षतेखाली समिती स्थापन करण्यात आली आहे.  

या समितीत कृषी अधिकारी, पुणे महानगरपालिकेचे अधिकारी, कृषी उत्पन्न बाजार समितीचे सचिव, पेट्रोल, डिझेल कंपन्यांचे अधिकारी, गॅस वितरण संघटना, भुसार व्यापार संघटनांचे अध्यक्ष आणि सहकार विभागाचे उपनिबंधक यांचा समावेश असणार आहे. ही समिती अन्नधान्य वितरण व्यवस्थित होत असल्याबाबत खात्री करणार आहे.

किराणा दुकाने, रेशन धान्य दुकाने, भाजीपाला विक्रीची ठिकाणे, दूध व वैद्यकीय सेवा देणारी दुकाने, दवाखाने याद्वारे नागरिकांना आवश्यक सुविधा मिळव्यात यादृष्टीने ही समिती काम करणार आहे. नागरिक अनावश्यक कारणांसाठी वाहने, खासगी वाहने, दुचाकीवरून एका प्रभागातून दुसऱ्या प्रभागात जाऊ नयेत यासाठीही ही समिती नियंत्रण ठेवणार आहे.