मध्य युरोपमधील जंगलात लागणाऱ्या आगीमुळे तापमानामध्ये वाढ होत आहे. त्यावर नियंत्रण आणणे शक्य झाल्यास जागतिक तापमानाची वाढ १.५ अंश सेल्सिअसपर्यंत मर्यादीत ठेवणे शक्य असल्याचे बार्सिलोना विद्यापीठातील संशोधनात पुढे आले आहे. हे संशोधन नेचर कम्युनिकेशन्स मध्ये प्रकाशित करण्यात आले आहे. मध्य युरोपमधील अनेक देशांमध्ये जंगलामध्ये काही ठराविक हंगामामध्ये वणवे लागतात. त्याचे जंगल, त्यातील सजीवांसह पर्यावरणावरही विपरीत परीणाम होतात. बार्सिलोना विद्यापीठातील संशोधक मार्को तुर्को आणि त्यांच्या गटाने केलेल्या या अभ्यासामध्ये सन २०१७ आणि २०१८ मध्ये युरोपातील वणवे लागण्याच्या हंगामामध्ये तापमानात होणाऱ्या वाढीचा अभ्यास करण्यात आला. वणव्यांमुळे होणाऱ्या मानवी, आर्थिक आणि पर्यावरणीय नुकसानीचा अंदाज घेण्यात आला. त्यासाठी विविध प्रादेशिक हवामान आकडेवारी व अंदाजांचा विचार करण्यात आला. यात युरोपमधील काही प्रांत विशेषतः ग्रीस, पोर्तुगाल, स्वीडनमधील मोठ्या वणव्यांचा परिणाम तीव्र दुष्काळ आणि उष्णतेच्या लाटांमध्ये होत असल्याचे दिसून आले.