सोलापूर ः सोलापूर जिल्ह्यासाठी महत्त्वाच्या असलेल्या कृष्णा-भीमा स्थिरीकरण योजनेबाबत मंगळवारी (ता. २८) विधान परिषदेत आमदार रणजितसिंह मोहिते पाटील यांनी प्रश्न मांडला. तसेच याबाबत आम्ही सातत्याने पाठपुरावा करतो आहोत. पण दखल घेतली जात नाही, याकडे लक्ष वेधले. त्यावर संबंधित मंत्र्यांसह कृष्णा खोरे महामंडळाच्या निवृत्त अधिकाऱ्यांची बैठक लावावी. तसेच दौरा करून प्रश्‍न मार्गी लावण्यासाठी योग्य पावले उचला, असे उपसभापती नीलम गोऱ्हे यांनी निर्देश दिले.  हा प्रश्‍न सविस्तरपणे मांडताना श्री. मोहिते पाटील म्हणाले, ‘‘सोलापूर, सांगली, सातारा, उस्मानाबाद, पुणे आणि बीड या सहा जिल्ह्यांतील ३१ तालुक्यांतील १२ लाख हेक्टर क्षेत्र ओलिताखाली आणण्यासाठी २००४ मध्ये तत्कालीन उपमुख्यमंत्री विजयसिंह मोहिते पाटील यांनी या योजनेला मंजुरी दिली. पण नंतर या योजनेकडे दुर्लक्ष झाले. तेलंगणामधील कालेश्‍वरम हा एक लाख कोटींचा प्रकल्प पाच वर्षांत पूर्ण झाला. मग हा प्रकल्प का होऊ शकत नाही, असा प्रश्‍नही त्यांनी केला. वास्तविक, सांगली, कोल्हापूर जिल्ह्यातून पावसाळ्यात वाहून जाणारे पाणी उजनीत आणण्यासाठी हा प्रकल्प आहे. याच पाण्यावर पुढे या जिल्ह्यांतील पाण्याची सोय होणार आहे, पण याबाबत कोणीच विचार करत नाही, असेही ते म्हणाले. या प्रकल्पासाठी निधीचे कारण सांगितले जाते. पण उजनीतून वाळू उपसा करावा, या वाळूच्या महसूलापोटी जमा होणाऱ्या निधीतून हा प्रकल्प पूर्ण होईल, तसे शक्य असल्याचे एका संस्थेच्या अहवालात म्हटले आहे,’’ याकडेही त्यांनी लक्ष वेधले.