जळगाव ः खानदेशात दादर ज्वारी अनेक भागांत पक्व होऊन कापणी, मळणीवर येत आहे. आगाप पेरणीची तापी, गिरणा, पांझरा नदीकाठच्या ज्वारी पिकाची लवकरच कापणी सुरू होईल, अशी स्थिती आहे. 

कोरडवाहू रब्बी पीक म्हणून खानदेशात दादर ज्वारीची ओळख आहे. पारंपरिक बियाण्याची पेरणी शेतकरी करतात. काळ्या कसदार क्षेत्रात एकरी आठ ते १० क्विंटल ज्वारीचे उत्पादन घेतले जाते. तसेच पशुधनाला सकस चाराही उपलब्ध होतो. यंदा खानदेशात सुमारे ५० हजार हेक्टरवर ज्वारीची पेरणी झाली आहे. त्यात दादर ज्वारीचे पीक अधिक आहे. यात ऑक्टोबरच्या मध्यात पेरणी केलेले पीक मळणी, कापणीवर आले आहे. अनेक भागात पीक जोमात आहे. मध्यंतरी वेगाच्या वाऱ्याने पिकाचे जळगाव जिल्ह्यातील अमळनेर, चोपडा, धुळ्यातील शिरपूर भागात नुकसान झाले. जळगाव जिल्ह्यात जळगाव, चोपडा, अमळनेर, पाचोरा, भडगाव आदी भागांत ज्वारी पीक अधिक आहे. या भागात अनेक शेतकरी ज्वारी कापणी, मळणीची तयारी करीत आहेत. कापणीसाठी गावोगावी मजुरांचे गट तयार झाले आहे. एकरी तीन ते साडेतीन हजार रुपये मजुरी दर ज्वारी कापणी, कणसे खुडून ती एका ठिकाणी गोळा करणे, कडबा गोळा करणे आदी कामांसाठी घेतला जात आहे. मागील वर्षी अनेक तालुक्यांमध्ये मजूरटंचाई होती. कोविडचा प्रकोपही फेब्रुवारीपासून सुरू झाला होता. यामुळे शेतीकमांवरही परिणाम झाला होता. यंदाही कोविडचा प्रकोप आहे, पण मृत्युदर व दवाखान्यात दाखल करण्याची गरज कमी असल्याने मजूरटंचाई कमी राहील, असेही चित्र आहे. पीक दर्जेदार आहे. यामुळे बाजारात बऱ्यापैकी दर मिळतील, अशीदेखील अपेक्षा शेतकऱ्यांना आहे.