सातारा  ः खटाव तालुक्यातील कलेढोण परिसरातील शेतकऱ्यांनी अनेक समस्यांवर मात करीत निर्यातक्षम द्राक्ष उत्पादन घेतले आहे. ही द्राक्षे नुकतीच जर्मनी, नेदरलॅंडला निर्यात करण्यात आली आहेत. सध्या निर्यात केलेल्या द्राक्षांना ११० ते १२५ रुपये प्रतिकिलो दर मिळत असल्याचे शेतकऱ्यांनी सांगितले.

खटाव तालुक्यातील प्रामुख्याने कलेढोण, मायणी, निमसोड, मोराळे, चितळी, विखळे, डांगेवाडी या कमी पर्जन्यमान असलेल्या भागातील शेतकऱ्यांनी कष्टाच्या जोरावर माळारानावर द्राक्षाच्या बागा फुलवल्या आहेत. शेतकऱ्यांना चांगले दर तसेच मोठ्या बाजारपेठ मिळाव्यात, यासाठी कृषी विभागाकडून द्राक्ष निर्यातीसाठी प्रोत्साहन दिले जाते. निर्यातीसाठी द्राक्षाचा दर्जा, नियम व अटी माहिती मिळण्याच्या दृष्टीने कृषी विभागाकडून प्रशिक्षणे देण्यात आली आहेत. यातून यावर्षी ४२६ शेतकऱ्यांनी निर्यातक्षम बागांची नोंदणी केली आहे. 

निमसोड (ता. खटाव) येथील एका कंपनीच्या माध्यमातून आत्तापर्यंत ३०० टन द्राक्षांची जर्मनी, नेदरलँड या देशात निर्यात करण्यात आहे. तसेच, सांगलीतील एका कंपनीच्या माध्यमातून दुबई, इंग्लड या देशांमध्येही द्राक्षे पाठविली जात आहेत.  नुकतेच निमसोड येथून द्राक्ष कंटेनर रवाना करण्यात आले. या वेळी मंडल कृषी अधिकारी दिलीप दाभाडे, द्राक्ष बागायतदार चेतन वरूडे, शिवम वरूडे, शुभम वरूडे, जितेश कदम, सुनील मोरे उपस्थित होते.