Pune News : राज्यातील ऊसतोडणी मशीनचे (हार्वेस्टर) तब्बल ३०० कोटी रुपयांचे अनुदान बाकी आहे. मागील २०१८ पासून ते अनुदान मिळत नाही. येत्या महिनाभरात ऊसतोडणी मशीनला अनुदान देण्याचा निर्णय न झाल्यास येणाऱ्या गळीत हंगामात एकही मशीन चालू होणार नाही. याशिवाय काही कारखान्यांचे मागील हंगामातील तोडणी वाहतूक बिल अजून दिलेले नाही. अशा साखर कारखान्याला एकही मशीन न देण्याचा इशारा राज्य मशीन मालक संघटनेचे अध्यक्ष अमोलराजे जाधव यांनी दिला आहे.

श्री. जाधव म्हणाले की, शेतीक्षेत्रामध्ये यांत्रिकीकरण व्हावे, यासाठी कृषी व सहकार खात्याच्या माध्यमातून केंद्र व राज्याच्या सहकार्यातून विविध योजना सुरू केल्या. या मशीनसाठी केंद्र आणि राज्य शासनातर्फे राष्ट्रीय कृषी विकास योजनेतून अनुदान उपलब्ध करून दिले जात होते. ते २०१७ पर्यंत चालू होते. २०१७ मधील २३ मशीन अनुदानासाठी प्रलंबित आहेत.