सोलापूर ः सोलापूर कृषी उत्पन्न बाजार समितीच्या (Market Committee) आवारात गतसप्ताहात कारली, दोडका, गवारला चांगला उठाव मिळाला. त्यांची आवक तशी जेमतेम राहिली, पण मागणीतील सातत्यामुळे दरात पुन्हा सुधारणा झाल्याचे सांगण्यात आले.

बाजार समितीच्या आवारात गतसप्ताहात कारल्याची आवक रोज १५ क्विंटल, दोडक्याची २० क्विंटल आणि गवारची १० ते १२ क्विंटल अशी राहिली. या सर्व फळभाज्यांची आवक स्थानिक भागातूनच राहिली. पण मागणी असल्याने या आधीच्या सप्ताहाच्या तुलनेत दरात मात्र चांगली सुधारणा झाली.

कारल्याला प्रतिक्विटंलला किमान १५०० रुपये, सरासरी २००० रुपये आणि सर्वाधिक ३५०० रुपये, दोडक्याला किमान १५०० रुपये, सरासरी २५०० रुपये आणि सर्वाधिक ४५०० रुपये तर गवारला ३५०० रुपये, सरासरी ४५०० रुपये आणि सर्वाधिक ५५०० रुपये असा दर मिळाला. त्याशिवाय टोमॅटो, सिमला मिरचीचे दरही काहीसे स्थिर राहिले.

टोमॅटोची आवक प्रतिदिन १०० ते २०० क्विंटलपर्यंत तर सिमला मिरचीची आवक दोन ते पाच क्विटंलपर्यंत राहिली. टोमॅटोला प्रतिक्विंटलला किमान ४०० रुपये, सरासरी ८०० रुपये आणि सर्वाधिक १२०० रुपये तर सिमला मिरचीला किमान २५०० रुपये, सरासरी ३००० रुपये आणि सर्वाधिक ४००० रुपये असा दर मिळाला.

कांदा दर टिकून

या सप्ताहात कांद्याची आवक बऱ्यापैकी राहिली. रोज १०० ते १५० गाड्यांपर्यंत आवक राहिली. कांद्याची आवक स्थानिक भागातूनच राहिली. पण मागणीमुळे या आधीच्या आठवड्याच्या तुलनेत कांद्याचे दर पुन्हा टिकून राहिले. कांद्याला प्रतिक्विंटलला किमान १०० रुपये, सरासरी १५०० रुपये आणि सर्वाधिक ३५०० रुपये असा दर मिळाल्याचे सांगण्यात आले.