Jalgaon News : खानदेशात केळी दरात मागील १८ ते २० दिवसांत क्विंटलमागे १२०० ते १३०० रुपयांची घट झाली आहे. सध्या कमाल दर २१५० रुपये प्रतिक्विंटल आहे. तर किमान दर १४५० ते १९०० रुपये प्रतिक्विंटल आहेत.

केळीची गुणवत्ता, दर्जा लक्षात घेऊन केळीला दर दिले जात आहेत. २१५० रुपये दर अत्यल्प शेतकऱ्यांना सध्या मिळत आहे. खानदेशात केळी आवकेत कुठलीही वाढ मागील सात ते आठ दिवसांत झालेली नाही.

परंतु दरात मात्र घट झाली आहे. मध्य प्रदेशातील बऱ्हाणपूर येथील बाजारात केळीला लिलावात कमाल २००० रुपये प्रतिक्विंटलपर्यंत दर मिळत आहेत. तेथे केळीची आवक घटली आहे. फारशी दर्जेदार केळी तेथे लिलावात येत नसल्याची स्थिती आहे.

दोन ते १० टन क्षमतेच्या वाहनांतून तेथे केळी येत आहेत. तेथे सध्या प्रतिदिन सरासरी ३० ट्रक (एक ट्रक १० टन क्षमता) केळीची आवक होत आहे. परंतु दरात तेथे सतत घट झाली आहे. बऱ्हाणपुरातील लिलावानुसार खानदेशात केळीची थेट किंवा शिवार खरेदी केली जाते.

खानदेशात सध्या रोज ५० ते ५५ ट्रक (एक ट्रक १६ टन क्षमता) आवक होत आहे. आवकेत पुढील आठवड्यात आणखी घट होईल.