अकोला ः जिल्‍ह्यात गेल्या काही दिवसांपासून रासायनिक खतांची टंचाई (Fertilizer Shortage) भेडसावत आहे. रेल्वे रॅक (Railway Rack For Fertilizer) लागलेल्या नसल्याने खतपुरवठा (Fertilizer Supply) ठप्प पडलेला आहे. अशा स्थितीत आता डीएपी, युरियाची मागणी (Urea Demand) वाढलेली आहे. त्रस्त झालेल्या शेतकऱ्यांच्या प्रश्‍नावर शिवसेना जिल्हा प्रमुख गोपाल दातकर अप्पर जिल्हाधिकारी अनिल खंडागळे यांची भेट घेत बफर स्टॉक खुला करण्याची मागणी केली. याची दखल घेत जिल्हा प्रशासनाने तातडीने ३२० टन खत खुले करण्याची सूचना कृषी विभागाला केली आहे.

खरीप हंगामात सध्या युरियाची मोठी टंचाई जाणवत आहे. शेतकरी यामुळे त्रस्त झाले आहेत. गेले काही दिवस सुरू असलेला पाऊस सध्या थांबलेला आहे. त्यामुळे शेतीची कामे पुन्हा सुरू झाली असून पिवळ्या पडलेल्या पिकांना युरियाची खतमात्रा शेतकरी देऊ लागले.

बाजारात युरियाची टंचाई असल्याने शेतकऱ्यांची पायपीट सुरू आहे. याची दखल घेत शिवसेनेने अप्पर जिल्हाधिकाऱ्यांची भेट घेऊन तातडीने खते उपलब्ध करून देण्याची मागणी केली. जिल्ह्यात ६६० टन खताचा बफर स्टॉक आहे. अडचणीच्या काळात हे खत वापरले जाते. सध्या गरज असल्याने हा साठा खुला करण्याची मागणी करण्यात आली होती.