वावडे, जि.जळगाव ः मागील वर्षी सोयाबीनला चांगले दर (Soybean Rate) होते. यामुळे शेतकऱ्यांनी सोयाबीन पेरणीला (Soybean Sowing) पसंती दिली. यातच अतिपावसाने उत्पादनात (Soybean Production) काहीशी झाली आहे. सध्या सोयाबीन काढणी (Soybean Harvesting) सुरू असून, सोयाबीन शेतकऱ्यांच्या घऱात येताच व्यापाऱ्यांनी दर पाडले आहेत.

सध्या कमाल दर सा़डेचार हजार रुपये प्रतिक्विंटल, असे आहेत. मागील हंगामात दर सहा ते आठ हजार रुपये प्रतिक्विंटल होते. काही महिन्यांपूर्वीदेखील दर टिकून होते. पण सोयाबीनचे उत्पादन हाती येताच दर पाडल्याने शेतकऱ्यांत नाराजी आहे.

निसर्गाच्या लहरीपणामुळे शेतकरी पूर्णपणे उद्ध्वस्त होण्याची वेळ आलेली आहे. कधी अतिवृष्टी, कधी दुष्काळ तर कधी बाजारपेठेत उत्पादन केलेल्या मालाला योग्य भाव न मिळाल्यामुळे शेतकरी वारंवार अडचणीत येत आहेत. यावर्षी खरिपाच्या सुरुवातीला पेरणी योग्य पाऊस झाल्याने खरिपाची पेरणी वेळेत झाली.

सोयाबीन काढण्यासाठी तीन ते चार हजार रुपये एकरी मजुरी देऊन देखील मजूर मिळत नसल्याचे दिसते. सोयाबीन काढण्यासाठी शेतकऱ्याची चांगलीच दमछाक होत आहे.

आर्थिक संकट कायम

तीन महिन्यांपूर्वी सोयाबीन पेरणीच्या वेळी सोयाबीनला आठ हजार रुपयांपर्यंत भाव होता. परंतु सोयाबीन काढण्याची वेळ आली आणि भाव पडले. त्यामुळे आता मशागत आणि पेरणीसाठी झालेला खर्च देखील निघणार नसल्याने शेतकरी आर्थिक अडचणीत सापडणार आहे.