Nashik News : येथे ''एनसीसीएफ''च्या माध्यमातून खरेदी-विक्री संघाच्या केंद्रावर सोयाबीनच्या हमीभावाने खरेदीला प्रारंभ करण्यात आला आहे. खरेदी विक्री संघाचे चेअरमन ॲड.राजेंद्र ठाकरे, संचालक विजय कुंभार्डे, अनिल काळे, आनंदा बनकर, व्यवस्थापक लक्ष्मण सोनवणे, दत्तू नरोटे व शेतकरी आदी उपस्थित होते.

गेल्या तीन वर्षांपासून सर्वत्र सोयाबीनला हमीभावापेक्षा कमी दर मिळत असल्याने उत्पादकांना तोटा सहन करावा लागत होता. या पार्श्वभूमीवर केंद्र व राज्य सरकारने सोयाबीनच्या हमीभाव खरेदीला मान्यता देऊन कार्यवाही केली आहे.

सोयाबीनची चार हजार ८९२ रुपये प्रतिक्विंटल हमीभावाने खरेदी करण्यात येत आहे. चांदवड खरेदी विक्री केंद्रावर आतापर्यंत हमीभावाने खरेदी करण्यासाठी अंदाजे सातशे शेतकऱ्यांनी फॉर्म भरले आहेत. तर तीनशे ते सव्वातीनशे शेतकऱ्यांची ऑनलाइन नोंदणी झाली. बुधवारी खरेदी केंद्रावर साधारण ५० क्विंटल सोयाबीनची खरेदी करण्यात आली. विक्रीसाठी आणले होते.

जाचक अटी रद्द करण्याची मागणी

सोयाबीन खरेदीसाठी सरकारने ओटीपीची अट घातल्याने ऑनलाइन नोंदणीसाठी फार वेळ जात आहे. ऑनलाइन नोंदणी लवकर होत नाही. त्यामुळे ऑनलाइन नोंदणीसाठी ओटीपीची अट सरकारने रद्द करावी व एकरी पाच क्विंटल ऐवजी पंधरा क्विंटल सोयाबीन खरेदी करावी, अशी मागणी या वेळी उपस्थित सोयाबीन उत्पादक शेतकरी यांनी केली.