Sindhudurg News : जिल्ह्यात या वर्षीच्या काजू हंगामास प्रारंभ झाला असून, बांदा येथे काजू बी ला प्रतिकिलो १५० रुपये दर मिळाला आहे. तेथील शेतकरी नितीन मावळणकर यांनी प्रथम काजू विक्रीचा मान मिळविला आहे.

दर वर्षीच्या तुलनेत या वर्षी काजू हंगाम लांबला आहे. जिल्ह्याच्या अनेक भागांत अजूनही काजूला मोहोर येत असल्याचे चित्र आहे. काही ठिकाणी फळधारणा होत आहे. मात्र जिल्ह्यातील बांदा, दोडामार्ग या भागांमध्ये पहिल्या टप्प्यात आलेल्या काजू मोहराची बी परिपक्व होण्यास सुरुवात झाली आहे.

जिल्ह्याच्या उर्वरित भागाच्या तुलनेत या परिसरात महिना ते २५ दिवस अगोदर काजू हंगाम सुरू होतो. दरम्यान, बांदा येथील काजू उत्पादक नितीन मावळणकर यांनी या वर्षी सर्वांत पहिली काजू बी विक्री बांदा बाजारपेठेत केली आहे.

त्यांना प्रतिकिलो १५० रुपये दर मिळाला आहे. या वर्षी काजू बी ला चांगला दर राहील, अशी अपेक्षा शेतकऱ्यांना आहे. या वर्षी दिवाळी कालावधीत अनेक कारखानदारांकडे सिंधुदुर्गातील काजू बी उपलब्ध नव्हती.

त्या कालावधीत कारखानदारांनी अधिक दराने काजू बी खरेदी केली होती. काजूगराचे दरात देखील चांगली सुधारणा झाली होती. त्यामुळे यावर्षी काजू बीला चांगला दर मिळण्याची शक्यता आहे.