Akola News : सोयाबीन हंगामाला वेग आला असून बाजारपेठेतील आवकही वाढलेली आहे. येथील कृषी उत्पन्न बाजार समितीत या आठवड्यात साडेपाच हजार क्विंटलपेक्षा अधिक आवक होत आहे. सोयाबीनचा किमान दर ३४०० तर कमाल ४६०० रुपयांपर्यंत आहे. तर, सोयाबीन सरासरी ४४०० रुपये दराने विकली जात आहे.

या महिन्यात दसऱ्याआधीपासूनच बऱ्याच ठिकाणी सोयाबीनची काढणी सुरू झाली होती. बहुतांश सोयाबीन पावसाच्या तडाख्यात सापडले. उघडीप मिळताच शेतकरी सोयाबीनच्या सोंगणी, मळणीच्या कामाला लागलेे. आता पाऊस ओसरला असून सोयाबीन हंगामाने पुन्हा वेग धरला. एकीकडे शेतशिवारात सोयाबीन काढणीची लगबग सुरू आहे.

दुसरीकडे बाजारपेठांमध्ये आवकही दरदिवसाला वाढत आहे. शनिवारी (ता.२६) अकोल्यात सुमारे ६०३३ क्विंटल एवढी आवक झाली होती. पावसाचे वातावरण निवळल्याने आवक वाढत आहे. तसेच हंगामही शिगेवर पोहोचला आहे.

नवीन सोयाबीनमध्ये आर्द्रतेचे प्रमाण अधिक आहे. तयार झालेला माल सुकवायला योग्य वातावरण मिळत नसल्याने अडथळे येत आहेत. अशा स्थितीत बरेच शेतकरी काहीसे ओलसर सोयाबीन विकून मोकळे होत आहेत. यामुळे किमान दर ३४०० पासून कमाल दर ४६०० रुपयांपर्यंत अकोला बाजार समितीत मिळत आहे.

दर्जेदार सोयाबीन साडेचार हजारांवर विकले जात आहे. कमाल दर मात्र काही क्विंटल मालालाच मिळाला. सरासरी ४४०० रुपये दरात अधिक मालाची विक्री झाल्याचे बाजार समितीकडून स्पष्ट करण्यात आले. आता सोयाबीन काढणीला वेग आल्याने येत्या काही दिवसांत अधिक प्रमाणात आवकही वाढू शकेल.