Hingoli News : हिंगोली कृषी उत्पन्न बाजार समितीअंतर्गत धान्य बाजारात (भुसार मार्केट) तुरीच्या दरात सुधारणा सुरू आहे. कमाल दर दहा हजार रुपयापर्यंत वधारले आहेत. किमान दर नऊ हजारांवर आहेत.

हिंगोली धान्य बाजारात शनिवारी (ता. ३) तुरीची ३०० क्विंटल आवक होऊन प्रतिक्विंटल किमान ९५०० ते कमाल १०००० रुपये तर सरासरी ९७५० रुपये दर मिळाले.

हिंगोली जिल्ह्यात गतवर्षीच्या (२०२२) खरीप हंगामात अतिववृष्टीमुळे बुरशीजन्य रोगाचा प्राद्रुर्भाव झाल्यामुळे तुरीच्या उतपादकतेत घट झाली आहे.

त्यामुळे धान्य बाजारात तुलनेत निम्म्याहून कमी आवक आहे. त्यामुळे एक दिवसआड आवक घेतली जात आहे. स्थानिक परिरातून तुरीची आवक होत आहे. सध्या एक दिवसाआड २०० ते ३०० क्विंटल आवक आहे.

गुरुवारी (ता. १) तुरीची ३०० क्विंटल आवक होऊन प्रतिक्विंटल किमान ९००० ते कमाल ९६५५ रुपये तर सरासरी ९३२७ रुपये दर मिळाले.

मंगळवारी (ता. ३०) तुरीची १०० क्विंटल आवक होऊन प्रतिक्विंटल किमान ९१९९ ते कमाल ९६९५ रुपये तर सरासरी ९४४७ रुपये दर मिळाले. खुल्या बाजारातील किरकोळ व्यापारी (फडीधारक) देखील दहा हजार रुपयांच्या आसपास खरेदी करत आहेत, असे सूत्रांनी सांगितले.