Jalgaon News : खानदेशात पपईची आवक टिकून आहे. दर थेट जागेवर किंवा शिवार खरेदीत शेतकऱ्यांना तीन ते चार रुपये प्रतिकिलो, असे मिळत आहेत. दरात मागील २५ ते २६ दिवसांत कुठलीही सुधारणा झालेली नाही. खानदेशात डिसेंबरमध्ये पपईची आवक वाढली. सध्या प्रतिदिन ४५ ट्रक (एक ट्रक १६ टन क्षमता) पपईची आवक खानदेशात होत आहे.

सर्वाधिक आवक नंदुरबार जिल्ह्यात होत आहे. पपईची पाठवणूक पंजाब, हरियाना, दिल्ली, काश्मीर, उत्तर प्रदेशात केली जात आहे. पपईचे दर ऑक्टोबरनंतर सतत कमी झाले. ऑक्टोबरमध्ये सरासरी ३५ रुपये प्रतिकिलोचा दर शेतकऱ्यांना जागेवर मिळाला होता. या कालावधीत पपईची आवकही अल्प होती.

नोव्हेंबरमध्ये सरासरी दर २० रुपये प्रतिकिलो, असा जागेवर शेतकऱ्यांना मिळाला. परंतु डिसेंबरमध्ये दरात मोठी घट झाली. डिसेंबरमध्ये सरासरी दर सहा रुपये प्रतिकिलो, असा मिळाला. डिसेंबरमध्ये आवकेत सतत वाढ झाली. आवक अधिक व मागणी कमी, अशी स्थिती होती.

या कालावधीत अनेकांनी पपई बागा परवडत नसल्याने त्या काढून फेकल्या. या महिन्यात प्रतिकिलो सरासरी तीन रुपये दर शेतकऱ्यांना पहिल्या पंधरवड्यात थेट जागेवर पपई विक्रीसंबंधी मिळाला.

पपईची आवक सध्या स्थिर आहे. डिसेंबरमध्ये आवक काही दिवस ५५ ते ६० ट्रक होती. त्यात चढउतार झाला. परंतु या महिन्यातील आवक काही दिवस ५० ट्रक राहिली. तर सध्या ४५ ट्रक पपईची आवक होत आहे. दर प्रतिकिलो तीन ते चार रुपये प्रतिकिलो, असे दर्जानुसार मिळत आहेत.

रोज २५ ते २६ ट्रक आवक

नंदुरबारात रोज २५ ते २६ ट्रक पपईची आवक होत आहे. शहादा तालुक्यात सर्वाधिक साडेचार हजार हेक्टरवर पपईची लागवड झाली होती. यामुळे या भागात आवक अधिक आहे.

१५ नंबर व ७८६ वाणांच्या पपईची लागवड खानदेशात झाली असून, १५ नंबर वाणाच्या पपईतून आवक रखडत सुरू आहे. ७८६ वाणांच्या बागांमध्ये नैसर्गिक समस्या व विषाणूजन्य रोगांमुळे फळाचे नुकसान झाले आहे. याचाही फटका शेतकऱ्यांना बसला आहे. त्यात यंदा दर कमी असल्याने आर्थिक नुकसानदेखील सुरू आहे.