Market Bulletin : सोयाबीन आणि सोयापेंडच्या भावावरील दबाव कायम आहे. आंतरराष्ट्रीय बाजारात आज दुपारपर्यंत सोयाबीन आणि सोयापेंडच्या भावात काहीशी सुधारणा झाली होती. तर देशात भावपातळी कायम आहे. देशातील बाजारातील सरासरी दरपातळी आज ४ हजार ३०० ते ४ हजार ६०० रुपयांच्या दरम्यान होते.

बाजारातील आवकही टिकून आहे. तसेच मागणी मंदावलेली आहे. त्यामुळे सोयाबीन बाजारावरील दबाव कायम दिसतो. आणखी काही दिवस सोयाबीन बाजारातील ही स्थिती कायम राहू शकते, असा अंदाज सोयाबीन बाजारातील अभ्यासकांनी व्यक्त केला. 

कापसाच्या भावात मागील चार दिवसांपासून काहीसे चढ उतार सुरु आहेत. आंतरराष्ट्रीय बाजारात वायदे आणि प्रत्यक्ष खरेदी भाव कालच्या तुलनेत काहीसे वाढले होते. आंतरराष्ट्रीय बाजारात मागील चार दिवसांमध्ये भाव कमी झाले तरी देशातील भावापेक्षा जास्तच आहेत. तर देशातील कापूस आवक खूपच घटली आहे.

काल देशात ८४ हजार गाठी कापसाची आवक झाली होती. तर सरासरी भावपातळी ७ हजार २०० ते ७ हजार ५०० रुपयांच्या दरम्यान होती. देशातील बाजारात कापसाचे भाव तेजीतच राहतील असा अंदाज कापूस बाजारातील अभ्यासकांनी व्यक्त केला. 

कांद्याचे भाव देशातील बाजारात स्थिरावले आहेत. दुसरीकडे आवकही स्थिर आहे. काही बाजारांमध्ये आता उन्हाळ कांद्याची आवक वाढत आहे. सरकारने बांगलादेश आणि युएईला कांदा निर्यातीची परवानगी दिल्याने बाजाराला काहीसा आधार मिळाला आहे.

कांद्याची सरासरी भावपातळी आज १४०० ते १७०० रुपयांचा भाव मिळाला. तर बाजारातील आवक स्थिर होती. कांदा बाजारातील आवक मार्च महिन्यात मर्यादीत होण्याची शक्यताही काही अभ्यासक व्यक्त करत आहेत. 

देशातील बाजारात तुरीचे भाव टिकून आहेत. दुसरीकडे तुरीची बाजारातील आवक कमीच आहे. सरकार आयात वाढविण्याचा प्रयत्न करत आहे. पण आयातीवर देखील मर्यादा दिसून येत आहे. परिणामी तुरीचे भाव ९ हजार ५०० ते १० हजार ५०० रुपयांच्या दरम्यान टिकून आहेत.

यंदा तुरीचे उत्पादन मोठ्या प्रमाणात घटले आहे. त्यामुळे बाजारात आवकेचा दबाव जाणवण्याची शक्यता खूपच आहे. यामुळे तुरीचे दर टिकून राहू शकतात, असा अंदाज तूर बाजारातील अभ्यासकांनी व्यक्त केला.

टोमॅटोचे भाव देशातील बाजारात मागील काही दिवसांपासून टिकून आहेत. टोमॅटोचे भाव मागील मागील काही आठवड्यांपासून काहीसे वाढत आहेत. सध्या बाजारात टोमॅटोला सरासरी १ हजार ८०० ते २ हजार ४०० रुपयांच्या दरम्यान भाव मिळत आहे.

तर बाजारातील आवक दिवसेंदिवस कमी होताना दिसत आहे. सध्या काही भागात पिकाला पाण्याची टंचाई जाणवत आहे. तर सध्या तोडा सुरु असलेले प्लाॅटही कमी झाल्याचे शेतकरी सांगत आहेत. त्यामुळे टोमॅटोच्या भावातील वाढ कायम राहील, असाही अंदाज टोमॅटो बाजारातील अभ्यासकांनी व्यक्त केला.