Latur News : नाफेडमार्फत राबविण्यात येत असलेल्या हमीभाव अर्थात किमान आधारभूत किंमत योजनेअंतर्गत यंदा जिल्ह्यात मोठ्या प्रमाणात सोयाबीन खरेदी करण्यात आली. महाराष्ट्र राज्य वखार महामंडळाकडून खरेदी केलेल्या सोयाबीन साठवणुकीचे नियोजन अतिशय सुयोग्य व गतिमानतेने करण्यात आले.

साठवणुकीसाठी महामंडाळाकडून स्वमालकीच्या गोदामात तसेच दुप्पट क्षमतेने भाड्याची गोदामे घेऊन नियोजन करण्यात आले होते. सोयाबीन उत्पादन लक्षात घेता आता लातूरला वखार महामंडळाचे सोयाबीन साठवणूक क्लस्टर तयार करण्यात येणार आहे, अशी माहिती महामंडळाचे अध्यक्ष व व्यवस्थापकीय संचालक कौस्तुभ दिवेगावकर यांनी दिली. या क्लस्टरमध्येच लातूरला सायलो पद्धतीने तसेच आधुनिक साठवणूक प्रकल्प येथे उभारला जात असल्याचे त्यांनी सांगितले.

सध्या महामंडळाच्या लातूर विभागातील पारंपरिक गोदाम क्षमतेवर मर्यादा आहेत. आधुनिक साठवण सुविधा क्षमतेत वाढ होणे गरजेचे आहे. सदर बाबींचा सखोल आढावा घेत व शेतकरी हिताच्या दृष्टीने श्री. दिवेगावकर यांनी महामंडळाच्या वतीने विविध ठिकाणी सायलो व आधुनिक साठवण प्रकल्पांचे नियोजन करून उभारणी करण्याचे निर्देश दिले आहेत.

येथील एमआयडीसी परिसरात नवीन सायलो प्रकल्प व अत्याधुनिक गोदामांची उभारणी होणार आहे. लातूर जिल्हा सोयाबीन उत्पादनामध्ये अग्रेसर असल्याने सोयाबीनची मूल्यसाखळी निर्माण करण्यासाठी व लातूर येथे साठवणूक क्षमतेतील कमतरता लक्षात घेऊन दहा हजार टन क्षमतेच्या सायलो उभारणीचा पथदर्शी प्रकल्प उभारण्यात येत आहे.

या प्रकल्पाचा मुख्यमंत्री देवेंद्र फडणवीस यांच्या शंभर दिवस कृती आराखड्यामध्ये प्राधान्याने समावेश करण्यात आला आहे. सायलो बांधकामाची निविदा काढण्यात आली आहे. तसेच दहा हजार टन क्षमतेचे आधुनिक साठवणूक सुविधेने सज्ज अशा गोदामाची उभारणी देखील करण्यात येत आहे. या प्रकल्पासाठी वखार महामंडळास राज्य शासनाच्या स्मार्ट योजनेंतर्गत निधी उपलब्ध होणार असल्याचे श्री. दिवेगावकर यांनी सांगितले.

पानगावला तीन हजार टन क्षमतेचे गोदाम

यासोबतच पानगाव (ता. रेणापूर) येथे वखार महामंडळाला कृषी उत्पन्न बाजार समितीने जागा उपलब्ध करून दिली आहे. येथे तीन हजार टन क्षमतेचे गोदाम उभारणी करून नवीन वखार केंद्र सुरू करण्यात येत आहे. कामकाजाची निविदा प्रक्रिया अंतिम टप्प्यात आहे. चापोली येथे आधुनिक सुविधा असलेले नवीन गोदाम तयार करण्यात येत आहे. याची साठवण क्षमता बाराशे टन इतकी आहे. याची निविदा प्रक्रिया पूर्ण झाली असून, लवकरच गोदाम बांधकामास सुरुवात होणार असल्याचे दिवेगावकर यांनी सांगितले.