बारामती : बारामती कृषी उत्पन्न बाजार समितीत (Baramati APMC) दर बुधवार आणि शनिवारी कापसाचे लिलाव (Cotton Trad) सुरू झाले आहेत. शनिवारी (ता. ५) आवारात १०० क्विंटल कापसाची आवक (Cotton Arrival) झाली. त्यास प्रतिक्विंटल ७९०१ रुपये असा दर (Cotton Rate) मिळाला. तर सरासरी ७८०० रुपयांचा दर मिळाला, अशी माहिती प्रशासक मिलिंद टांकसाळे यांनी दिली.

टांकसाळे म्हणाले, ‘‘कापूस हे नगदी आणि हमखास उत्पन्न देणारे पीक आहे. त्यामुळे बारामती, फलटण तसेच नजीकच्या तालुक्यांत कापसाच्या लागवडीत वाढ होत आहे. कापसाची मागणी, पुरवठा आणि दराची सध्याची परिस्थिती लक्षात घेता भविष्यात शेतकऱ्यांना फायदाच होणार आहे.

यासाठी बाजार आवारात शेतकरी व व्यापाऱ्यांसाठी विविध सुविधा पुरविण्याचा समितीचा मानस आहे. यापुढे बारामती बाजार समितीत कापूस मार्केट विकसित होण्यासाठी अडते, व्यापारी व बाजार समिती प्रयत्नशील राहील.’’

‘‘कापसाची उघड लिलावात विक्री तसेच अचूक वजनमाप आणि त्याच दिवशी पेमेंट असा बारामती बाजार समितीचा नावलौकिक आहे. त्यामुळे परस्पर व्यापाऱ्यांना कापूस विक्री करण्याऐवजी शेतकऱ्यांनी मार्केटमध्ये कापूस विक्रीस आणावा,’’ असे आवाहन बाजार समितीतर्फे करण्यात आले.