Indapur News : इंदापूर कृषी उत्पन्न बाजार समितीमध्ये कांद्याला रविवारी (ता. १) प्रति क्विंटल सहा हजार रुपये असा दर मिळाला. मक्याची ३५ हजारांहून अधिक पिशव्यांची आवक होऊन ५ कोटी ५० लाखांची उलाढाल झाली. यामध्ये मक्याला २ हजार २५१ रुपये भाव मिळाला, अशी माहिती सभापती तुषार जाधव यांनी दिली.

श्री. जाधव म्हणाले की, मुख्य बाजार इंदापूर येथे चालू सप्ताहात डाळिंब किमान २० ते १५१, पेरू १० ते २५, सीताफळ १० ते ५० प्रतिकिलो दराने विक्री झालेली आहे. तर मासे (मासळी) मार्केट इंदापूर भिगवण येथे मार्केटमध्ये व मासे (मासळी) विक्री उच्चांकी दरात होत असून त्यास खरेदीसाठी आंध्र प्रदेश, कलकत्ता, कर्नाटक, तेलंगणा अशा राज्यांतून मागणी आहे.

मार्केटमध्ये खरेदीदार खरेदी चांगल्या दरात करीत आहेत. बाजार समितीने शेतकऱ्यांच्या शेतीमालास चांगला दर मिळावा, या उद्देशाने मुख्य बाजार इंदापूर अकलूज रोडलगतच्या बाजार आवारात धान्य सफाई यंत्र सुविधा उभारली. प्रति तास पाच टन क्षमतेने धान्य सफाई केली जाते. तसेच इंदापूर बाजार समितीने शेतमाल तारण योजनाही बाजार समिती सुरू केलेली आहे.

याचा फायदा शेतकऱ्यांनी घ्यावा. बाजार समितीने मुख्य बाजार इंदापूर मार्केट ६० टन, शिवलिलानगर-इंदापूर अकलूज रोडलगत ८० टन, उपबाजार भिगवण, निमगाव केतकी व वालचंदनगरचे ठिकाणी ६० टन व क्षमतेचे भुईकाटा (वे-ब्रिज) असून त्यांची २४ तास सेवा उपलब्ध आहे. शेतकऱ्यांनी बाजार समितीच्या विविध योजना व उपक्रमाचा लाभ घ्यावा.