Jalgaon News : खानदेशात मागील दोन-तीन दिवसांत केळी दरात क्विंटलमागे ५० ते १०० रुपयांची सुधारणा झाली. दर प्रतिक्विंटल १००० ते १८५० ते १८६० रुपये असे आहेत. मध्य प्रदेशातील बऱ्हाणपूर येथील बाजारात किमान १४२२ ते २२११ रुपये प्रतिक्विंटलचा दर आहे. केळीची आवक अतिपावसाने मुक्ताईनगर, रावेर, यावल भागात कमी झाली आहे.

सध्या प्रतिदिन ९५ ट्रक (एक ट्रक १६ टन क्षमता) केळीची जळगाव जिल्ह्यात आवक होत आहे. तसेच धुळे व नंदुरबारात मिळून २० ते २२ ट्रक केळीची आवक होत आहे. केळीची आखातातील निर्यात आणखी घटली असून, सध्या प्रतिदिन चार कंटेनर केळीची पाठवणूक धुळे, नंदुरबार भागातून होत आहे. केळीला उठाव कायम आहे. परंतु आवक आणखी पाच ते सात ट्रकनी घटली आहे.

यामुळे केळीच्या दरात ५० ते १०० रुपयांची सुधारणा झालेली दिसत आहे. किमान दरही १००० रुपयांवर आहेत. सध्या नवती केळीमधील आवक कमी आहे. जुनारी (केळीची ८० ते ९० टक्के काढणी पूर्ण झालेली बाग) व पिलबाग (खोडवा) केळीमधून काढणी सुरू आहे. रावेर, मुक्ताईनगर, यावल, धुळ्यातील शिरपूर भागात पिलबाग व जुनारी केळी अधिक आहे.

जळगाव जिल्ह्यातील चोपडा, जळगाव व जामनेरातही जुनारी केळीमधून आवक सुरू आहे. केळीला उत्तर भारतातून मागणी येऊ लागली आहे. फक्त काश्मीरातील केळीची पाठवणूक सुरळीत नाही. परंतु उत्तर प्रदेश, राजस्थान येथे पाठवणूक सुरळीत आहे. कमी दर्जाच्या केळीची छत्तीसगड, राज्यातील नागपूर, कल्याण, ठाणे, नवी मुंबई भागांत पाठवणूक होत आहे.

उत्तर भारतात ७० ते ८० ट्रक पाठवणूक सुरू आहे. दिल्ली येथील पूरस्थिती दूर होत आहे. परंतु केळीची मॉल, हातविक्रीला सध्या काहीशी अडचण आहे. यामुळे दिल्ली येथील पाठवणूक अल्प किंवा कमी आहे.

मध्य प्रदेशात पिकाला पुराचा फटका

केळीची आवक मागील आठवड्यात कमी झाली. ही आवक पुढेही आणखी काहीशी कमी होऊ शकते. मध्य प्रदेशात बऱ्हाणपूर जिल्ह्यात पूरस्थिती आहे. भोकरी व इतर नद्यांनी धोक्याची पातळी ओलांडली आहे. तसेच पुरामुळे अनेकांचे केळी पीक वाहून गेले आहे. यामुळे बऱ्हाणपुरात केळी दरात चांगली वाढ मागील आठवड्याच्या अखेरीस झाली आहे.