नागपूर ः आषाढी एकादशी काही दिवसांवर आली आहे. आषाढी एकादशीनिमित्त (Ashadhi Ekadashi) बाजारपेठ सज्ज झाली असली तरी यंदा मागील वर्षाच्या तुलनेत शेंगदाणे (Groundnut) आणि साबुदाण्याच्या (Sabudana Rate) भावात घट झाली आहे. मात्र, भगरीच्या भावात सुधारणा आहे. बाजारपेठेत उपवासाच्या पदार्थांची आवक वाढली आहे.

आषाढी एकादशी म्हणजे वारकऱ्यांसाठी मोठा उत्सव. या एकादशीला भाविक पंढरपूरला विठुरायाच्या दर्शनासाठी रवाना झाले आहेत. परंतु, ज्यांना आपल्या कामामुळे पंढरपूरला जाणे शक्‍य नाही, असे भाविक एकादशी भक्तिभावाने साजरी करतात. या दिवशी अनेकजण उपवास करतात. या पार्श्‍वभूमीवर बाजारपेठदेखील सज्ज झाली आहे. फळाच्या भावातही दहा टक्के वाढ झाली आहे. ग्राहकांकडून फळांना अधिक मागणी आहे. गेली दोन वर्षे कोरोनाचे सावट होते. त्यामुळे मर्यादा आल्या होत्या. आता सर्वच निर्बंध काढण्यात आल्याने बाजारात धावपळ दिसत आहे. आषाढी एकादशी घरोघरी मोठ्या उत्साहात साजरी केली जाते. यानिमित्ताने अनेक जण उपवास करतात. चवीला काहीसे गोड असलेल्या रताळ्याला उपवासाच्या पदार्थांमध्ये स्थान असल्यामुळे त्याची मोठी मागणी असते. बटाट्याची मागणीही वाढली असून ३५ ते ४० रुपये प्रती किलो दराने विक्री होत आहे.

ग्राहकांना थोडाफार दिलासा देणारी बाब म्हणजे साबुदाण्याचे भाव गेल्या महिन्याच्या तुलनेत किलोमागे पाच ते दहा रुपयांनी कमी झाले आहेत. गेल्या महिन्याच्या तुलनेत दर्जेदार भगरीच्या दरात आठ ते १० रुपयांनी सुधारणा झाली आहे. सध्या १०० ते ११० रुपये प्रती किलो असा दर आहे. यासह विविध प्रकारचे पेंडखजूर बाजारात दाखल झाले आहेत. राजगिरा, उपवासाची भाजणी, चिवडा, उपवासाचा चिवडा, नॉयलॉनच्या साबुदाण्याचा चिवडा आदी खाद्यपदार्थ बाजारात उपलब्ध असून तयार उपवास पदार्थांना गेल्या काही वर्षांत मागणी वाढल्याचे विक्रेत्यांनी सांगितले. सध्या एक किलो साबुदाण्याचा दर ६४ ते ७० रुपये आहे. तर १२० रुपये प्रती किलो दराने मिळणारे शेंगदाण्याचा दर सध्या ११० ते ११२ रुपयांच्या घरात आहे. उपवासानिमित्ताने तूप, शेंगदाणा तेल, साबुदाणा, शेंगदाणे, भगर यासह उपवासाचे तयार पीठ यास मागणी वाढली आहे.

प्रतिकिलो दर

भगर - १०० ते ११० रुपये

साबुदाणा - ६४ ते ७० रुपये

शेंगदाणे - १०५ ते ११५ रुपये

पेंडखजूर - ९०-११०