Sindhudurg News : जिल्ह्यातील कुंभारमाठ (ता.मालवण) येथील आंबा बागायतदार उत्तम सूर्यकांत फोंडेकर यांच्या बागेतून हापूस आंब्याची पहिली पेटी नाशिकला पाठविण्यात आली आहे. चार डझन आंब्याच्या या पेटीला २५ हजार रुपये दर मिळाला आहे.

जुलै-ऑगस्ट महिन्यात आलेल्या मोहोराचे संरक्षण करून त्यांनी उत्पादन घेतले आहे. आंब्याची पहिली पेटी पाठविण्याचा मान त्यांनी चौथ्यांदा मिळविला आहे. सिंधुदुर्गात या वर्षी ६ जून ते आतापर्यंत अखंडपणे मुसळधार पाऊस सुरू आहे.

मात्र अशा प्रकारे प्रतिकूल वातावरण असतानाही मालवण तालुक्यातील कुंभारमाठ येथील उत्तम फोंडेकर यांनी जुलै, ऑगस्टमध्ये हापूस आंब्याच्या काही झाडांना मोहोर आला होता. त्या मोहोराचे संरक्षण करण्याचा निर्णय घेतला. प्रत्येक वर्षी ते काही झाडांवरील मोहोराचे संरक्षण करीत असतात.

केवळ सेंद्रिय कीटकनाशकांचा वापर करून त्यांनी हा मोहोर टिकविला आहे. त्यातून आता त्यांना दोन ते तीन पेटी आंबा उत्पादन मिळण्याचा अंदाज आहे. यातील पहिली चार डझन आंब्याची पेटी पाडव्याचा मुहूर्तावर त्यांनी नाशिक येथील ग्राहकाला विक्री केली. या ग्राहकाकडून त्यांना २५ हजार रुपये दर देण्यात आला आहे.

आणखी पंधरा ते वीस दिवसांनी आणखी चार डझन आंबा उत्पादन त्यांना मिळेल अशी अपेक्षा आहे. श्री.फोंडेकर यांनी यापूर्वी तीन वेळा सर्वप्रथम आंबा पेटी पाठविण्याचा मान मिळविला होता. आता चौथ्यांदा त्यांनी पेटी पाठविली आहे.