सांगली ः गुजरात राज्यात झालेल्या पावसाचा फटका डाळिंबाला (Pomegranate Crop Damage) बसला आहे. यामुळे सेटिंग झाले नसल्याने सुमारे ५० टक्के नुकसान झाले आहे. सध्या डाळिंबाचा (Pomegranate Season) ५ ते १० टक्के हंगाम सुरू असून, डाळिंबाला प्रति किलोस ८० ते ९० रुपये दर (Pomegranate Rate) मिळत आहे. नुकसान झाल्याने मार्च, एप्रिलच्या दरम्यान, गुजरातमधील डाळिंब विक्रीस येण्याची शक्यता आहे. त्यामुळे महाराष्ट्रच्या बाजारपेठेत विक्री येण्याची शक्यता नाही, अशी माहिती डाळिंब संघाच्या सूत्रांनी दिली. त्यामुळे राज्यातील डाळिंबाच्या दर स्थिर राहतील, असा अंदाज डाळिंब उत्पादक शेतकऱ्यांनी व्यक्त केला आहे.

गेल्या तीन वर्षांपासून गुजरातमध्ये डाळिंबाच्या क्षेत्रात वाढ होताना दिसते आहे. या राज्यात सुमारे २० हजार हेक्टरहून अधिक डाळिंबाचे क्षेत्र आहे. त्यापैकी अंदाजे १० ते १२ हजार हेक्टरवर मृग बहर धरला जातो. हंगाम धरला, त्यानंतर फुलकळीच्या दरम्यान पावसाने हजेरी लावली. या पावसामुळे फुलगळ आणि अपेक्षित असे बागामध्ये सेटिंग झाले नाही. फळ धारणा झाली नाही.

या तिन्हीमुळे सुमारे २५ ते ३० टक्के नुकसान झाले. त्यातच सेटिंग झालेल्या बागांमध्ये अति पावसामुळे कुजवा, ‘तेलकट’ रोगाचा प्रादुर्भाव झाला. यामुळे २० ते २५ टक्के नुकसान झाले. असे एकूण ५० टक्के नुकसान झाले. त्यानंतर शेतकऱ्यांनी पुन्हा नव्याने हंगाम धरण्यास सुरुवात केली आहे.

गुजरातमध्ये यंदाच्‍या हंगामात आलेल्या नैसर्गित आपत्तीच्या संकटामुळे डाळिंबाचे नुकसान झाले आहे. यामुळे डाळिंबाच्या उत्पादनातही अंदाजे १५ ते २० टक्क्यांनी घट होईल. सध्या गुजरातमधील डाळिंबाचा हंगाम सुरू झाला असला, तरी अवघ्या ५ ते १० क्षेत्रांवरील डाळिंबाची काढणी सुरू झाली आहे. मुंबईच्या बाजारपेठेत गुजरातची डाळिंब आली आहेत. परंतु आवक कमी असून, डाळिंबाला अपेक्षित अशी मागणीही नाही.

वास्तविक, गुजरातमधील डाळिंबाचा हंगाम दरवर्षी डिसेंबर महिन्याच्या अखेरी प्रारंभ होते. जानेवारी, फेब्रुवारी महिन्यांत हंगामास गती येते. ही डाळिंब महाराष्ट्रात विक्रीला येतात. राज्यात गेल्या वर्षीपर्यंत गुजरातमधील डाळिंबाची फारशी आवक होत नव्हती. त्यामुळे डाळिंबाचे दर टिकून राहत होते.

मात्र गेल्या वर्षी गुजरातमधील राज्यातील अनेक बाजारपेठेत डाळिंबाची आवक वाढली होती. त्याचा दणका राज्यातील डाळिंब उत्पादकांना बसला होता. परिणामी, डाळिंबाच्या दरात घसरण झाली होती. त्यामुळे शेतकऱ्यांना आर्थिक तोटा सहन करावा लागला होता.

मात्र गुजरातमध्ये नैसर्गिक आपत्तीचे संकट ओढावल्याने डिसेंबर महिन्यात सुरू होणारा यंदाचा डाळिंबाचा हंगाम दोन ते तीन महिन्यांनी लांबणीवर पडणार आहे. डाळिंबाचा लांबणीवर पडणारा हंगामामुळे राज्यातील डाळिंबाच्या दरावर परिणाम होणार नाही. त्यामुळे यंदाचा हंगाम डाळिंब उत्पादक शेतकऱ्यांना फायदेशी ठरणार आहे, अशी आशा शेतकऱ्यांनी व्यक्त केला आहे.

- पावसामुळे फुलगळ झाली

- सेटिंग होण्यास अडथळे

- गुजरातमधील डाळिंब राज्यात विक्रीस येण्याची फारशी शक्यता नाही

- दोन ते तीन महिने हंगाम लांबणीवर पडणार