Parbhani News : शहरातील विविध ठिकाणच्या बाजारामध्ये झेंडूची मोठ्या प्रमाणावर आवक झाली. शुक्रवारी (ता.१) दुपारी झेंडूचे दर प्रतिकिलो ४० ते ६० रुपये होते. अपेक्षित दर न मिळाल्यामुळे झेंडू उत्पादक शेतकऱ्यांची निराशा झाली.

परभणी येथील गांधीपार्क, वसमत रस्ता, जिंतूर रस्ता आदी ठिकाणच्या बाजारात परभणी जिल्ह्यातील विविध तालुके तसेच हिंगोली जिल्ह्यातील सेनगाव, वसमत आदी तालुक्यांतील शेतकऱ्यांनी मोठ्या प्रमाणावर झेंडू विक्रीसाठी आणला होता.

गुरुवारी (ता.३१) रात्रीपासून अनेक शेतकरी झेंडू घेऊन आले. गुरुवारी प्रतिकिलो ७० ते ८० रुपये किलो दर होते. परंतु शुक्रवारी (ता.१) सकाळी झेंडूची आणखी आवक झाल्यामुळे दर गडगडले. यंदाच्या पावसाळ्यातील अतिवृष्टी, सततचा पाऊस तसेच ऑक्टोबर महिन्यातील मान्सून्नोत्तर पाऊस यामुळे झेंडू उत्पादकांना मोठा आर्थिक फटका बसला.

करपा पडल्यामुळे झेंडूची प्रत खालावली. सुकळी (ता. सेनगाव, जि. हिंगोली) येथील शेतकरी अमरजित सिरसाट म्हणाले, की दसऱ्याला शेतातून ४० रुपये किलो दराने थेट शेतातून झेंडू विक्री केला. दिवाळीत लक्ष्मीपूजनाला झेंडूची आवक कमी राहील, त्यामुळे प्रतिकिलो १०० रुपयापर्यंत दर मिळतील या अपेक्षेने परभणी येथे झेंडू विक्रीस आणला.

मिरखेल (ता.परभणी) येथील शेतकरी संभाजी गायकवाड म्हणाले, की यंदा पावसामुळे झेंडू फुलांचे नुकसान झाले, परंतु आवक जास्त झाल्याने शेतकऱ्यांना अपेक्षित दर मिळाले नाहीत.