Nagar News : यंदा ज्वारीला चांगली मागणी राहील, दरही चांगला मिळेल, असा अंदाज व्यक्त होत असतानाच बाजारात ज्वारीची आवक व्हायला सुरुवात होताच, दरात घट झाल्याचे पाहायला मिळत आहे.

ज्वारीसाठी प्रसिद्ध असलेल्या नगर येथील बाजार समितीत २१०० ते ४३०० रुपये व सरासरी ३२०० रुपये प्रतिक्विंटल दर मिळत आहे. सध्या दर दिवसाला ८०० क्विंटलपर्यंत आवक होत आहे.

नगर जिल्ह्यासह सोलापूर, बीड, जालना आदी भागांत यंदा पुरेसा पाऊस नसल्याने शेतकऱ्यांना रब्बीत अन्य पिकांऐवजी ज्वारी पेरणीला प्राधान्य दिले. त्यामुळे गेल्या काही वर्षांपासून सातत्याने घट होत असलेल्या ज्वारीच्या क्षेत्रात राज्यात चार लाख हेक्टरने वाढ झाली आहे.

अलीकडच्या काळात ज्वारीची मागणीही वाढली आहे. मागील महिनाभरापूर्वी सात हजार रुपये क्विंटलपर्यंत ज्वारीचे दर गेले होते. मात्र आता ज्वारीची बाजारात आवक होताच दरात घट झाली आहे. नगर जिल्ह्यातील जामखेड, सोलापूर भागातून नगरला ज्वारीची आवक होत आहे.

मागील काही महिन्यांपूर्वी मागणी वाढल्याने ज्वारीचा दर सात हजार रुपये क्विंटलपर्यंत गेला होता. मात्र आता आवक वाढताच दर कमी झाले आहेत. त्यातही किरकोळ आणि ठोक दरात दुपटीने फरक आहे.

ठोक दरात विक्रीला २१०० ते ४३०० रुपये व सरासरी ३२०० रुपयांचा प्रतिक्विंटलला दर मिळत आहे. तर किरकोळ विक्रीचा दर ५० रुपये प्रतिकिलोपेक्षा अधिक आहे. ज्वारीच्या काढणीला वेग आला आहे.