जळगाव ः  बाजारात झेंडू (Marigold Market) फुलांची आवक गेल्या तीन दिवसांत वाढली आहे. दरही टिकून आहेत. किमान २५ व कमाल ३५ रुपये प्रतिकिलोचा दर या फुलांना घाऊक बाजारात शेतकऱ्यांना मिळाला.

वल्लभदास वालजी (गोलाणी) व्यापारी संकुलातील बाजारात पहाटेच आवक होते. सध्या रोज सुमारे ५७ क्विंटल झेंडू फुलांची आवक होत आहे. गेले दोन दिवस एवढीच आवक या बाजारात झाली. दरही कमाल ३५ रुपये प्रतिकिलो, असा शेतकऱ्यांना मिळाला. दिवाळी सणानिमित्त या फुलांना मागणी आहे. यामुळे दरही टिकून आहेत.

काही शेतकऱ्यांनी जळगाव शहरात विविध भागांत या फुलांची ग्राहकांना थेट विक्री सुरू केली. त्यात किमान ४० व कमाल ६० रुपये प्रतिकिलोचा दर शेतकऱ्यांना मिळाला. फुलांची आवक टिकून असल्याने तुटवडा कुठलाही जाणवत नसल्याचे सांगण्यात आले. गेल्या वर्षी कोविडमुळे पणन व्यवस्था आक्रसली होती. यामुळे अनेकांनी जून, जुलैमध्ये झेंडूची लागवड टाळली. परिणामी, पुढे दिवाळीला फुलांचा तुटवडा जाणवला व प्रतिकिलो २०० ते २५० रुपये प्रतिकिलोचा दर या फुलांना मिळाला.