Pune News : केंद्र सरकारने कांदा निर्यातबंदी उठवल्यानंतर कांद्याच्या भावात आज ५०० ते ७०० रुपयांपर्यंत वाढ झाली. कांद्याचा भाव २ हजार रुपयांवर पोचला. पण कांदा भावात लगेच फार मोठ्या तेजीची शक्यता धुसरच आहे.

कारण सरकारने निर्यातबंदी उठवली असली तरी किमान निर्यात मूल्य आणि निर्यात शुल्काचा खुट्टा मारून ठेवला.

केंद्र सरकारने शनिवारी (ता.४) सकाळी निर्यातबंदी उठवल्याची अधिसूचना काढली. पण सरकारने निर्यातबंदी उठवताना निर्यात आणि कांदा भाव जास्त वाढणार नाही, याची काळजीही घेतली.

सरकारने अधिसूनेतच कांद्यावर प्रतिटन ५५० डाॅलर किमान निर्यात मूल्य (एमईपी) लावले. तसेच त्यावर ४० टक्के निर्यातशुल्क कायम आहे. म्हणजेच एमईपीच्या ४० टक्के शुल्क कांदा निर्यातीवर लागणार आहे.

हे शुल्क होते टनाला २२० डाॅलर. म्हणजेच कांदा निर्यातीसाठी आता टनाला ७७० डाॅलरचे निर्यातशुल्क लागणार आहे. रुपयात जर याचा हिशोब केला तर टनामागे किमान ६४ हजार २०२ रुपये दराने कांदा निर्यात होईल.