Jalgaon News: खानदेशात केळी दरात मागील आठवड्यात किंचित घट झाली आहे. दर २२०० ते २३०० रुपये प्रति क्विंटल वरून २१०० रुपये प्रतिक्विंटल, असे दर्जेदार केळीस मिळत आहेत. आवकेत काहीशी वाढ झाली आहे. तसेच कुंभ मेळ्यासह महाशिवरात्रीनिमित्त आलेली मागणी पूर्ण झाल्याने केळी दरात किंचित घट दिसत आहे.

कुंभमेळा सुरू होताच केळी दरात मोठी सुधारणा झाली. कमाल दर १३०० रुपयांवरून २३०० रुपये प्रतिक्विंटलपर्यंत काही दिवसात पोचले. डिसेंबरमध्ये खानदेशात केळीची आवक कमी असतानाही दरात मोठी घट झाली होती. पण जानेवारीत दरात सुधारणा झाली. ही सुधारणा टिकून आहे. परंतु मागील आठवड्याच्या अखेरीस दरात क्विंटलमागे १०० ते २०० रुपयांची घट झाली आहे. केळीचे किमान दरही १५०० ते १६०० रुपयांवरून १३०० रुपये प्रतिक्विंटल, असे झाले आहेत.

सध्या बाजारात द्राक्षे, चिकू यांचीही आवक सुरू आहे. कलिंगडाचीदेखील काढणी सुरू झाली आहे. याचाही परिणाम केळी दरांवर झाल्याचा मुद्दा उपस्थित केला जात आहे. ऊन तापू लागल्याने रसाळ फळांना उठाव आहे. केळीला कुंभ व महाशिवरात्रीच्या पार्श्वभूमीवर उत्तरेकडून मोठी मागणी होती.

खानदेशात केळी आवकेतही मागील पाच ते सहा दिवसांत वाढ झाली आहे. मध्य प्रदेशातही केळीची आवक वाढली असून, तेथील बऱ्हाणपुरातही रोज ३० ते ३५ ट्रक (एक ट्रक १६ टन क्षमता) केळीची आवक होत आहे. खानदेशात रोज ४० ते ४२ ट्रक (एक ट्रक १६ टन क्षमता) केळीची आवक होत आहे.

उष्णता असल्याने केळीस उठाव मात्र आहे. परंतु आवकेत या आठवड्याच्या अखेरीस आणखी वाढ होईल. खानदेशातून केळीची निर्यातही सुरू आहे. निर्यातीच्या केळीस प्रतिक्विंटल २३०० ते २३५० रुपये प्रतिक्विंटलचा दर आहे. रोज चार ते पाच कंटेनर (एक कंटेनर २० टन क्षमता) केळीची पाठवणूक खानदेशातून विविध निर्यातदार कंपन्या परदेशात करीत आहेत. केळीची आवक रावेर, मुक्ताईनगर, यावल, चोपडा, जामनेर या भागांत आहे. धुळ्यातील शिरपुरातूनही केळी आवकेत वाढ होत आहे.