Jalna News : येथील बाजार समितीमध्ये रेशीम कोष खरेदी बाजारात रेशीम कोषांची आवक मंदावली आहे. गत आठवडाभरात आवक झालेल्या रेशीम कोषांना २७ हजार ते ४७ हजार ५०० रुपये प्रतिक्विंटल दरम्यान दर मिळाला.

उन्हाच्या तीव्रतेचा फटका दुष्काळातही आश्‍वासक साथ देणाऱ्या रेशीम उद्योगाला बसताना दिसतो आहे. जालना रेशीम कोष खरेदी बाजारात गत आठवडाभरात सातत्याने कोष आवकेत झालेली घट ते स्पष्ट करताना दिसते आहे.

माहितीनुसार, २३ एप्रिलला जालना रेशीम कोष खरेदी बाजारात १० क्विंटल आवक झालेल्या रेशीम कोषांना २३ हजार ते ५० हजार ५०० रुपये प्रतिक्विंटल दरम्यान तर ४७ हजार ५०० रुपये प्रतिक्विंटलचा दर मिळाला.

२४ एप्रिलला रेशीम कोषांचे आवक १० क्विंटल झाली. या रेशीम कोषांना २७ हजार ५०० ते ४६ हजार ५०० रुपये प्रतिक्विंटल दरम्यान व सरासरी ३९ हजार रुपये प्रतिक्विंटलचा दर मिळाला. २५ एप्रिलला रेशीम कोषाची आवक १४ क्विंटल झाली.

या रेशीम कोषांना २६ हजार ५०० ते ४७ हजार रुपये प्रतिक्विंटल दरम्यान तर सरासरी ४१ हजार रुपये प्रति क्विंटलचा दर मिळाला. २७ एप्रिलला केवळ ३ क्विंटल आवक झालेल्या रेशीम कोषांचे दर २९ हजार ते ३८ हजार ५०० रुपये प्रतिक्विंटल दरम्यान, तर सरासरी दर ३७ हजार ५०० रुपये प्रतिक्विंटल राहिले.

२९ एप्रिलला रेशीम कोषाची आवक घटून दोन क्विंटलवर आली. या रेशीम कोषांना १५ हजार ते ३८ हजार रुपये प्रतिक्विंटल दरम्यान, तर सरासरी २७ हजार रुपये प्रतिक्विंटलचा दर मिळाला. ३० एप्रिलला पुन्हा रेशीम कोषांची आवक केवळ २ क्विंटल झाली. या रेशीम कोषांना १६ हजार ५०० ते ४७ हजार रुपये प्रतिक्विंटल दरम्यान तर ४२ हजार पाचशे रुपये प्रतिक्विंटलचा दर मिळाल्याची माहिती बाजार समितीच्या सूत्रांनी दिली.