कोल्हापूर : देशातील सर्वांत मोठा डेअरी ब्रँड असणाऱ्या ‘अमूल’ने (Amul Milk Rate) सर्व दुधाच्या विक्री दरात (Milk Sale Rate) २ रुपयांनी वाढ केली आहे. तसेच मदर डेअरनेही (Mother dairy) दूध विक्री दरामध्ये दोन रुपयांची वाढ केली आहे.

गुजरात, दिल्ली-एनसीआर, पश्‍चिम बंगाल, मुंबई यासह सर्व इतर बाजारपेठांमध्ये ही वाढ लागू असेल. नवीन दर आज (ता.१७) पासून लागू होतील.

या दरवाढीनुसार, अमूल गोल्डची किंमत ५०० मिलिसाठी ३१ रुपये, अमूल ताजा ५०० मिलिसाठी २५ रुपये आणि अमूल शक्ती ५०० मिलिसाठी २८ रुपये असेल. दूध उत्पादन व प्रक्रिया खर्चात वाढ झाल्याने ही दरवाढ करत असल्याचे प्रसिद्धी पत्रकात म्हटले आहे.

दूध उत्पादकांचा एकूण खर्च वाढल्याने गेल्याच वर्षी ‘अमूल’ने दूध उत्पादकांना आठ ते नऊ टक्के दरवाढ दिली होती. दूध उत्पादनांपासून पॅकिंगपर्यंतच्या सगळ्याच खर्चात मोठी वाढ झाल्याने विक्री खर्चात वाढ करावी लागत असल्याचे ‘अमूल’ने म्हटले आहे.