पुणेः देशात जून महिन्यात दडी दिलेल्या पावसाने जुलैमध्ये धुमाकूळ घातला. त्यातच मागील हंगामात कांद्याला अपेक्षित दर (Onion Rate) मिळाला नाही. त्यामुळे महाराष्ट्र, गुजरात आणि कर्नाटक या राज्यातील कांदा लागवडीवर (Onion Cultivation) परिणाम होत आहे. शेतकरी कांद्याऐवजी कापूस (Cotton), सोयाबीन (Soybean) आणि मुगाची लागवड करत असल्याचं जाणकारांनी सांगितलं.

देशात कांद्याचा खरिप हंगाम ऑक्टोबर ते डिसेंबर या काळात असतो. तर लेट खरिप जानेवारी ते मार्च आणि रबी हंगाम मार्च ते जून या काळात असतो. मात्र कांदा लागवडीला नैसर्गिक आपत्तींचा फटका बसत आहे. महाराष्ट्र कांदा उत्पादनात आघाडीवर आहे. राज्यातील आगाप खरिप कांदा उत्पादनावरही परिणाम झाला. देशातील एकूण कांदा उत्पादनात ३३ टक्के वाटा या हंगामातील कांद्याचा असतो. पण जून महिन्यात कमी झालेला पाऊस आणि जुलैत अति पावसाने पिकाचे नुकसान केले. जुलै महिन्यात मुसळधार पावसाने कांदा रोपवाटीकांचे नुकसाने केले. त्यामुळे शेतकऱ्यांना लागवडीत अडचणी येत आहेत. मागील हंगामात कांद्याचे नुकसान झाले. तसेच दरही कमी मिळाला. त्यातलनेत सोयाबीन आणि कापसाला चांगला दर होता. त्यामुळे राज्यातील शेतकरी यंदा कापूस आणि सोयाबीनला प्राधान्य देत आहेत.

कर्नाटकातही कांदा लागवड जवळपास २० टक्क्यांनी घटली. कर्नाटकात कांद्याखाली सरासरी दीड लाख हेक्टर क्षेत्र असते. पण मागील हंगामात मिळालेला कमी दर तसेच ऑगस्ट आणि सप्टेंबर महिन्यात होणारा अवकाळी पाऊस, यामुळे शेतकऱ्यांना फटका बसला. मागील दोन वर्षात पावसामुळे शेतकऱ्यांना कमी उत्पादन मिळाले. यंदाही हीच परिस्थिती कायम राहण्याची शक्यता व्यक्त होत आहे. त्यामुळे शेतकरी कापूस आणि मूग या पिकांकडे वळत आहेत. उत्तर कर्नाटकात २० ते २५ टक्के कांद्याखालील क्षेत्र कमी होऊ शकते, असे जाणकारांनी सांगितले.

गुजरातमध्येही मागील वर्षी अवकाळी पावसामुळं कांदा पिकाचं उत्पादन घटलं होतं. उत्पादन घटूनही शेतकऱ्यांना चांगला दर मिळाला नाही. त्यामुळे यंदा शेतकरी कांदा लागवडी कमी करण्याची शक्यता आहे. शेतकरी कापसासारख्या पिकाला प्राधान्य देत असल्याचे येथील शेतकऱ्यांनी सांगितले. कारण मागणी हंगामात कापसाला चांगला दर मिळाला होता. त्यामुळे गुजरातमध्ये गेल्यावर्षीपेक्षा कांदा बियाण्याची मागणी ३० टक्क्यांनी कमी आहे. कांदा लागवडीच्या काळात मागणी वाढू शकते, पण यंदा मागणी कमीच राहील, असा अंदाज बियाणे उद्योगाने व्यक्त केलाय.