अकोला : देशात दररोज पेट्रोल व डिझेलचे (Petrol) भाव वाढत आहेत. याची झळ सर्वसामान्यांसह शेतकऱ्यांनाही बसू लागली आहे. यंदाच्या हंगामात डिझेल दर वाढल्याने ट्रॅक्टरच्या (Tracter) साह्याने केल्या जाणाऱ्या सर्व प्रकारच्या मशागतीच्या दरातही ट्रॅक्टरमालकांनी वाढ केली आहे. मशागतीचा दर किमान २०० रुपयांनी महागल्याने याची मोठी झळ बसू लागली आहे. शिवाय शेतीचा उत्पादन खर्चही आणखी वाढणार आहे.

गेल्या काही दिवसांत पेट्रोल व डिझेलचे भाव स्थिरावले होते. मात्र पाच राज्यांतील निवडणुकांची रणधुमाळी आटोपताच हे दरवाढीचे चक्र फिरू लागले. गेल्या तीन दिवसांत पेट्रोलची तीन रुपयांपेक्षा अधिक दर वाढ झाली. अशीच दरवाढ डिझेलमध्येही होत आहे. अकोल्यात २२ मार्चला डिझेलचा दर ९३ रुपये ६५ पैसे दर होता. शनिवारी (ता. २६) हाच डिझेलचा प्रतिलिटर दर ९६.१७ रुपये एवढा झाला.

दरवाढ होत असल्याने सर्वसामान्यांचे जगणे मुश्कील झाले आहे. शहरी भागातील नागरिक इंधन दरवाढीने मेटाकुटीला आलेला आहे. तशीच शेतकऱ्यांचीही(Farmer) चिंता वाढली आहे. सध्याच्या काळात शेतीतील मशागतीची संपूर्ण कामे ट्रॅक्टरशिवाय केली जात नाहीत. आता पुढील हंगामाच्या तयारीचे दिवस सुरू होत आहे. गुढीपाडवा लोटताच शेतशिवारात(Farm) ही तयारी सुरू होत असते. रोटाव्हेटर, कल्टिव्हेटर, पंजी, अशा वेगवेगळ्या मशागती केल्या जातात. शिवाय सध्या थ्रेशरच्या साह्याने हरभरा मळणीचे कामही होत आहे. या सर्वच कामांसाठी ट्रॅक्टरचा वापर होतो. यासाठी लागणारे डिझेल महागल्याने ट्रॅक्टरमालकांनी थेट दरवाढ केली आहे. कामे करण्यासाठी शेतकऱ्यांसमोर दुसरा पर्यायही उपलब्ध नाही. शेतकऱ्यांना अनुदानाच्या स्वरूपात डिझेल पुरविण्याची मागणी केली जाऊ लागली आहे.

हार्वेस्टरने काढणी महागली..

गेल्या वर्षात वाशीम जिल्ह्यात गहू काढणीचा दर हार्वेस्टरने एकरी बाराशे रुपये होता. तो दर यंदा पंधराशे रुपये असा घेतला जात आहे. बुलडाणा जिल्ह्यात मागील वर्षी गहू(Wheat) काढणीचा दर १,५०० रुपये प्रति एकर होता तो या वर्षी २,००० रुपयांपर्यंत वाढला आहे.

सर्वच कामांचे दर वाढले आहेत. गेल्या हंगामात गहू, (Wheat) हरभरा (Chana) मळणी आमच्या भागात २०० रुपये पोते दराने केली जात होती. यंदा २७५ ते ३०० रुपये पोते झाले आहे. नांगरटीचा दर सरासरी २०० रुपयांनी वाढवण्यात आला आहे.
- अमोल खर्चे, शेतकरी,
आडविहिर, ता. मोताळा, जि. बुलडाणा